Գործադիրն առաջարկում է լուծել արտաբյուջետային հաշիվներով գործառնությունների կարգավորումների խնդիրը
1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ կառավարությունն օրենսդիր մարմին է ներկայացրել օրենքի նախագիծ, որով առաջարկում է օրենսդրորեն լուծել ՀՀ-ում անկախության օրվանից ձևավորված արտաբյուջետային հաշիվներով գործառնությունների հետ կապված օրենսդրական կարգավորումների խնդիրը:
«Արմենպրես»-ի փոխանցմամբ՝ նախագիծը հոկտեմբերի 2-ին ԱԺ պատգամավորներին ներկայացրեց ՀՀ ֆինանսների նախարար Ատոմ Ջանջուղազյանը:
«Այդ կարգավորումները ձևավորվել են տարբեր գործոններով և հանգամանքներով պայմանավորված: Մի մասը ձևավորվել է Խորհրդային Միության վերջին ժամանակահատվածի ժառանգած իներցիայով, մյուս մասը՝ ժամանակի ընթացքում այլ գործոններով պայմանավորված: Այժմ առաջարկվում է այս հարցը մեկընդմիշտ լուծել և այսուհետև միասնական մոտեցմամբ ունենալ բյուջետային բոլոր ծրագրերի իրականացումը՝ ի տարբերություն նախկին վիճակի»,- ասաց Ջանջուղազյանը: