Մեծ Բրիտանիայի խորհրդարանը դարձյալ մերժեց ընտրություններ անցկացնելու Ջոնսոնի առաջարկը

ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիայի Համայնքների պալատի անդամները վերջին օրերին երկրորդ անգամ քվեարկեցին երկրում վաղաժամկետ ընտրությունների անցկացման դեմ: Այդ մասին սեպտեմբերի 10-ին հայտնել են երկրի զանգվածային լրատվամիջոցները, տեղեկացնում Է «Արմենպրես»-ը:

Վաղաժամկետ ընտրությունների օգտին հանդես են եկել ներկա պատգամավորներից 293-ը, դեմ՝ 46-ը: Սակայն 650-տեղանոց խորհրդարանի շատ պատգամավորներ որոշել են չքվեարկել ո՛չ կողմ, ո՛չ դեմ: Որպեսզի վարչապետ Բորիս Ջոնսոնի առաջարկությունը հավանության արժանանար, այն պետք Է պաշտպանեին Համայնքների պալատի անդամների առնվազն երկու երրորդը՝ առնվազն 298 պատգամավոր, սակայն այդ արդյունքին հասնել չհաջողվեց: Անցյալ շաբաթ խորհրդարանը նույնպես մերժել Էր կառավարության համանման առաջարկությունը: Ջոնսոնն առաջարկում Էր ընտրություններն անցկացնել հոկտեմբերի 15-ին՝ մինչեւ հոկտեմբերի 31-ին Եվրամիությունից երկրի դուրս գալու նախատեսված վերջին ժամկետը:

Ընտրությունների շուրջը քվեակությունից անմիջապես հետո Մեծ Բրիտանիայի խորհրդարանը դադարեցրել Է աշխատանքը մինչեւ հոկտեմբերի 14-ը: Վաղաժամկետ ընտրությունների հարցի շուրջը պատգամավորները կրկին քվեարկել կարող են սոսկ վերադառնալուց հետո, հետեւաբար այժմ Մեծ Բրիտանիայում վաղաժամկետ ընտրություններ կարելի կլինի անցկացնել նոյեմբերի վերջից ոչ շուտ, այսինքն՝ Եվրամիությունից Մեծ Բրիտանիայի դուրս գալու ենթադրյալ ժամկետից՝ հոկտեմբերի 31-ից, հետո:

Սեպտեմբերի 9-ին Մեծ Բրիտանիայի Եղիսաբեթ Բ թագուհին ստորագրել Է օրենք, որը հետաձգում Է ԵՄ-ից երկրի դուրս գալն այն դեպքում, եթե մինչեւ 2019 թվականի հոկտեմբերի 31-ը համաձայնագիր չստորագրվի Բրյուսելի հետ, հաղորդել Է «Ինտերֆաքսը»: