Դեսպան Մկրտչյանը Սալոնիկի նավահանգստի ղեկավարությանը համագործակցության հեռանկարներին տեղում ծանոթանալու համար հրավիրել է Հայաստան
2 րոպեի ընթերցում
![Դեսպան Մկրտչյանը Սալոնիկի նավահանգստի ղեկավարությանը համագործակցության հեռանկարներին տեղում ծանոթանալու համար հրավիրել է Հայաստան](http://armenpress.am/resized/480/storage/images/articles/2024/07/19/31U2QzffnFtxiGHIbePySiYNAzJFxS7q6p7hJMAT.webp)
ԵՐԵՎԱՆ, 19 ՀՈՒԼԻՍԻ, ԱՐՄԵՆՊՐԵՍ: Հունաստանում ՀՀ արտակարգ և լիազոր դեսպան Տիգրան Մկրտչյանը հանդիպել է Սալոնիկի նավահանգստի գլխավոր ֆինանսական պատասխանատու Սպիրոս Ստամուի հետ։ Հանդիպմանը մասնակցել է Սալոնիկում ՀՀ պատվո հյուպատոս Ակիս Դագազյանը։
«Արմենպրես»-ի հաղորդմամբ՝ Հունաստանում Հայաստանի դեսպանության «Ֆեյսբուք»-ի էջը տեղեկացնում է, որ հանդիպմանը Սպիրոս Ստամուին դեսպան Մրտչյանին մանրամասն ներկայացրել է Սալոնիկի նավահանգստի վերջին ժամանակաշրջանում արձանագրած հաջողությունները, նավահանգստի ընդարձակվող ներուժը։ Նշվել է բալկանյան և հարավ-արևելյան եվրոպական տարածաշրջանում նավահանգստի կարևորագույն դերակատարության մասին, և որ առկա է արդյունավետ փախադրման ցանց Սալոնիկից մինչև հյուսիսային Եվրոպա: Նա նշել է, որ Եվրամիության կողմից այն ներառվել է տասը ռազմավարական նավահանգիստների ցուցակ։
Ըստ աղբյուրի՝ դեսպան Տիգրան Մկրտչյանը առաջարկել է առաջիկա առիթի դեպքում միջնորդել հայ տնտեսվարողների և Սալոնիկի նավահանգստի միջև հնարավոր համագործակցության հաստատման հարցում և հրավիրել նավահանգստի ղեկավարությանը այցելել Հայաստան՝ տեղում ծանոթանալու համագործակցության հեռանկարներին։
Նշվում է, որ հանդիպմանը քննարկվել է նաև ՀՀ կառավարության «Խաղաղության խաչմերուկ»-ի գաղափարը, ինչպես նաև Գյումրին որպես «չոր նավահանգիստ» կառուցելու նախագիծը։