Իտալիայի ամենաերիտասարդ կառավարությունը հավատարմության երդում տվեց
2 րոպեի ընթերցում
![Իտալիայի ամենաերիտասարդ կառավարությունը հավատարմության երդում տվեց](http://armenpress.am/resized/480/static/news/b/2019/09/987000.jpg)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Իտալիայի նոր կառավարությունը՝ Ջուզեպե Կոնտեի գլխավորությամբ, սեպտեմբերի 5-ին նախագահ Սերջո Մատարելլայի ներկայությամբ հավատարմության երդում Է տվել հանրապետությանը Կվիրինալի պալատում:
Նախարարները եւ վարչապետը երդվել են ծառայել ի բարօրություն Իտալիայի եւ ստորագրել են համապատասխան երդումը: Երդմնակալության պահից կառավարությունը համարվում Է գործող:
Խորհրդարանի պալատներում Կոնտեի կառավարությանը վստահության հարցի շուրջ քվեարկությունը կկայանա սեպտեմբերի 9-ին եւ 10-ին: Սեպտեմբերի 4-ին Կոնտեն Մատարելլային ներկայացրել Էր իր կաբինետի նախարարների ցուցակը եւ համաձայնել Էր գլխավորել կառավարությունը: Այն ձեւավորել են «5 աստղի շարժումը» եւ ավելի վաղ ընդդիմադիր Դեմոկրատական կուսակցությունը: Նաեւ դրանում ընդգրկվել են մեկ անկուսակցական եւ նոր կոալիցիան պաշտպանող «Ազատներ եւ հավասարներ» փոքր ձախ կուսակցության մեկ ներկայացուցիչ:
Ընդամենը նախարարների խորհրդի կազմում տեղ Է գտել 22 մարդ: Դրանում յոթ պաշտոն ստացել են կանայք:
Պաշտոնների մեծ մասը (11) ստացել Է «Շարժումը», որը հարաբերական մեծամասնություն ունի խորհրդարանում:
Ներկայիս կառավարությունն ամենաերիտասարդն Է դարձել Իտալիայի Հանրապետության ողջ պատմության ընթացքում. նրա ներկայացուցիչների միջին տարիքը ընդամենը 47 Է, հաղորդել Է ՌԻԱ Նովոստին: