Թորիների խմբակցությունից վտարվել են բոլոր այն պատգամավորները, որոնք հանդես են եկել Ջոնսոնի դեմ

ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ:Պահպանողական այն պատգամավորները, որոնք քվեարկել են Մեծ Բրիտանիայի խորհրդարանի օրակարգի փոփոխման օգտին ի հեճուկս վարչապետ Բորիս Ջոնսոնի կոչի, վտարված են թորիների խորհրդարանական խմբակցությունից եւ չեն կարող ներկայացնել կուսակցությունը հաջորդ ընտրություններում: Այդ մասին, ինչպես տեղեկացնում Է «Արմենպրես»-ը, հայտնել են վարչապետի դիվանատանը: Սեպտեմբերի 3-ի երեկոյան Համայնքների պալատը ձայների մեծամասնությամբ քվեարկել Է խորհրդարանի աշխատանքի օրակարգի փոփոխման օգտին եւ Համայնքների պալատին օժտել Է Եվրամիությունից Բրիտանիայի դուրս գալն ավելի ուշ ժամկետ փոխադրելու մասին օրինագծի քննարկման իրավունքով:

Վտարված պատգամավորների թվում են Բրիտանիայի նախկին վարչապետ Ուինսթոն Չերչիլի թոռը՝ Նիկոլաս Սոմսը, Բրիտանիայի խորհրդարանի վետերան Քեն Քլարքը, ինչպես նաեւ Ֆիլիպ Հեմոնդը, որը եղել Է արտաքին գործերի, պաշտպանության եւ տրանսպորտի նախարար, իսկ Թերեզա Մեյի կաբինետում զբաղեցրել Է գանձապետարանի կանցլերի պաշտոնը:

Ընդամենը սեպտեմբերի 4-ին Պահպանողական կուսակցությունից օրակարգի փոփոխման օգտին քվեարկել Է 21 պատգամավոր: Քվեարկությունից հետո Բորիս Ջոնսոնը հայտարարել Է վաղաժամկետ ընտրություններ անցկացնելու վճռականության մասին, եթե պատգամավորները քվեարկեն «բրեքսիթի» շուրջը բանակցությունները հետաձգելու օգտին:

«Ես ընտրություններ չեմ ցանկանում, բայց եթե սեպտեմբերի 4-ին պատգամավորները քվեարկեն բանակցությունները դադարեցնելու ու եւս մեկ անհեթեթ հետաձգման հասնելու օգտին, դա կլինի խնդիրը լուծելու միակ հնարավորությունը»,- հայտարարել Է նա: Ինչպես նշել Է BBC-ի թղթակից Յուրի Վենդիքը, վաղաժամկետ ընտրությունները Ջոնսոնի եւ նրան լոյալ շրջապատի միակ հույսն Է, քանի որ խորհրդարանում նրանց նկատմամբ ընդդիմության գերակշռությունն այժմ կազմում Է 43 ձայն: