1 րոպեի ընթերցում
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: Հայաստանի ութ մարզում մինչև սեպտեմբերի 1-ը 18 նախակրթարան կբացվի:
«Արմենպրես»-ի փոխանցմամբ` այս մասին օգոստոսի 20-ին ՀՀ վարչապետ Նիկոլ Փաշինյանի հետ զրույցում ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը:
«Կրթության բարելավման ծրագրի շրջանակում ամեն տարի իրականացրել ենք սա: Նախորդ տարի 17-ն ենք բացել: Դրանք հիմնանորոգված են, ներսի գույքը լրիվ նոր է, և մինչև սեպտեմբերի 1-ը ամբողջությամբ կահավորված կլինեն»,- ասաց նախարարը:
Նիկոլ Փաշինյանը նշեց, որ պայմանավորվածություն է ձեռք բերվել, որ նորոգված նախակրթարաններում, դպրոցներում ու մանկապարտեզներում պետք է լինի նոր գույք:
Արայիկ Հարությունյանն անդրադարձավ թվային տվյալներին՝ հայտնելով, որ այս պահին 3-6 տարեկան երեխաների 38%-ն է հաճախում նախադպրոցական ուսումնական հաստատություններ: Այժմ նախարարությունը նախադպրոցական կրթության մասին օրենքի նախագիծն է պատրաստում և մշակում նախադպրոցական ուսումնական հաստատությունների նոր մոդելներ, որոնք առաջարկելու է համայնքներին: