2 րոպեի ընթերցում
ԵՐԵՎԱՆ, 12 ՕԳՈՍՏՈՍԻ, ԱՐՄԵՆՊՐԵՍ: Հայաստանում ընթացող «Խաղաղության մարտիկ» միջազգային մրցույթի մասնակիցները շրջայց են կատարել ՀՀ տեսարժան վայրերով:
Ինչպես «Արմենպրես»-ին տեղեկացրին Հարավային ռազմական օկրուգի մամուլի ծառայությունից, մրցույթի մասնակիցներն այցելության ընթացքում ծանոթացել են Հայաստանի պատմությանը, մշակույթին և ավանդույթներին:
«Շնորհիվ մրցույթի անցկացման վայր` հարուստ պատմություն ունեցող Հայաստանի, մարզիկներին հնարավորություն է ընձեռվել ոչ միայն մրցել լավագույն «Խաղաղության մարտիկ» կոչմանն արժանանալու և իրենց գործընկերների փորձը որդեգրելու համար, այլև ծանոթանալու մրցույթի կազմակերպիչ երկրի մշակույթին, պատմությանը և ժողովրդի ավանդույթներին»,- ասաց Ռուսաստանի հավաքականի գլխավոր մարզիչ փոխգնդապետ Սերգեյ Մուրզինը:
Մրցույթի մասնակից երկրների զինծառայողներն այցելել են Հայրենական մեծ պատերազմի թանգարան, Պատմության ազգային թանգարան, Հայկական ճարտարապետության թանգարան, Մատենադարան, Սարդարապատի հուշահամալիր, Ծիծեռնակաբերդ և Եռաբլուր զինվորական պանթեոն, որտեղ ծաղիկներ են խոնարհել Հայաստանի հերոսների հիշատակին:
Շրջայցի շրջանակում մասնակիցներն այցելել են Գառնու տաճար և Գեղարդի վանք, որտեղ հյուրերին սովորեցրել են հայկական ժողովրդական պարեր և ներկայացրել հայկական հոգևոր երգերը: