2 րոպեի ընթերցում
ԵՐԵՎԱՆ, 8 ՕԳՈՍՏՈՍԻ, ԱՐՄԵՆՊՐԵՍ։ ԹՈՒՄՈ ստեղծարար տեխնոլոգիաների կենտրոնի ամառային ճամբարին կմասնակցեն Վրաստանի 10-18 տարեկան երեխաները։
Ինչպես տեեկացնում է «Արմենպրես»-ը, Կառավարությունը օգոստոսի 8-ին որոշում է կայացրել 14 միլիոն 150 հազար դրամ գումար տրամադրել նրանց մասնակցությունն ապահովելու համար։
ՀՀ կրթության, գիտության, մշակույթի և սպորտի նախարար Արայիկ Հարությունյանի խոսքով՝ փոխայցելությունների արդյունքում պարզվել է, որ հայ և վրացի պատանիների միջև կա շփումների շատ լուրջ բաց։
«Մեր նախարարությունը մի նախագիծ է իրականացնում, որով վրացի պատանիները Հայաստանում մասնակցում են ամառային ճամբարներին, վրացական կողմը նույնպես պատրաստակամություն է հայտնել նման նախագիծ իրականացնել և իրականացնում է։ Շուրջ 50 պատանի Վրաստանից մասնակցել են ԹՈՒՄՈ-ի կազմակերպած ամառային ճամբարին։ Բավականին լավ ծրագիր է իրականացվել, և Կառավարությունը հանձառություն է արել այս շփումները ավելացնելու, որպեսզի երիտասարդ սերնդի մակարդակով փոխշփումները լինեն պատշաճ մակարդակի, և ճանաչելիությունը մեծ լինի։ Այս ծրագիրը շարունակական բնույթ կկրի»,-ասաց Հարությունյանը։
Նախարարը բարձր է գնահատում համագործակցությունը Վրաստանի նախարարության հետ։
ՀՀ վարչապետ Նիկոլ Փաշինյանը լավ գաղափար է համարում համատեղ ճամբարների կազմակերպումը և կարծում է, որ ոչ միայն պետք է շարունակել նման ծրագրերը, այլ նաև դրանց ծավալները պետք է ընդլայնել։