Կառավարությունն արտոնություն տրամադրեց հերթական ներդրումային ծրագրին

ԵՐԵՎԱՆ, 1 ՕԳՈՍՏՈՍԻ, ԱՐՄԵՆՊՐԵՍ: Կառավարությունը գերակա ոլորտում իրականացվող ներդրումային ծրագրի շրջանակում մաքսային արտոնություն տրամադրեց «Պրոֆպանել» ընկերությանը:

«Արմենպրես»-ի փոխանցմամբ, Էկոնոմիկայի նախարար Տիգրան Խաչատրյանը նշեց, որ ընկերության կողմից ներմուծվող ապրանքներն օգտագործվելու են արևային վահանակների արտադրության մեջ։

«Արդեն իսկ իրականացվել է 385 մլն դրամի ներդրում: Նախատեսվում է ծրագրի շրջանակում իրականացնել 2,9 մլրդ դրամի ներդրում»,- ասաց Խաչատրյանը՝ ավելացնելով, որ ծրագրի արդյունքում ընկերությունում առկա 43 աշխատատեղին կավելանան ևս 5-ը՝ 150-200 հազար դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 5,9 մլրդ դրամ: