4 րոպեի ընթերցում
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ:Վաղուց արդեն թանգարաններն ընդլայնել են իրենց գործունեության շրջանակները՝ նկատի ունենալով հանրության պահանջներն ու ակնկալիքները, ինչ-որ դեպքերում անգամ ձևավորելով դրանք։ Այս սկզբունքը որդեգրողներից մեկն էլ Ալեքսանդր Սպենդիարյանի տուն-թանգարանն է, որտեղ հերթական անգամ նախաձեռնվել է սովորականից տարբեր նախագիծ՝ հատուկ շրջայց-համերգ տարեցների համար։ Նախագծի շրջանակում մեծ սիմֆոնիստի տանը հյուրընկալվեց Նորքի տուն-ինտերնատի 30 բնակիչ։ Նպատակը նրանց համար ինտելեկտուալ ժամանց կազմակերպելն էր և առօրյան նոր տեղեկություններով ու երաժշտությամբ յուրահատուկ դարձնելը¸ ինչպես նաև տուն-թանգարանում տարիքային և սոցիալական տարբեր խմբերի համար իրականացվող ծրագրերի ընդլայնումն ու շարունակականությունն ապահովելը։
«Սպենդիարյանն ինչքան գործ է արել հայերիս համար, որ էլի նոր բան իմացա։ Շատ լավ պատմեցիք։ Շատ շնորհակալ եմ»,-«Արմենպրես»-ի հաղորդմամբ՝ իր տպավորություններն այսկերպ ձևակերպեց տիկին Վիոլետան։
«Փոքր¸ սիրուն թանգարան է՝ ջահել աշխատակիցներով։ Նրանք¸ ջահել երաժիշտների հետ միասին¸ մեզ համար տոնական օր սարքեցին»,- կարծիք հայտնեց պարոն Հակոբը։
«Էնքան շնորհակալ եմ տեսած-լսածիս համար։ Շնորհակալ եմ բոլոր կազմակերպիչներին։ Ինչ լավ ու տաղանդավոր երեխեք ուենենք, շատ լավ երգեցին։ Ապրե՛ն»,- եզրափակեց պարոն Գագիկը։
Նախաձեռնությունը Ալեքսանդր Սպենդիարյանի տուն-թանգարանինն էր¸ իրականացմանը սիրով միացել են «Խարույկ» վոկալ-գործիքային քառյակ և «Gasparyan’s Artists» վոկալ խումբը (գեղ. ղեկ. Նալլի Գասպարյան) և երգիչ-երաժիշտ Անուշիկ Ստեփանյանը։ Նորքի տուն-ինտերնատի տնօրինության անմիջական ու գործուն արձագանքն էլ չի ուշացել։
Տուն-թանգարանի տնօրեն Մարինե Օթարյանը նշեց. «Տուն-թանգարանը նմանատիպ նախագծեր է իրականացել տարբեր ժամանակներում, հերթականը հնարավոր դարձավ մասնավոր աջակցությամբ։ Համատեղ ջանքերը միշտ ավելի մեծ արդյունք են տալիս։ Պիտի շարունակենք ու փորձենք առավել բազմակողմ դարձնել մեր գործունեությունը և ավելի նպաստել տարբեր տարիքային և սոցիալական խմբերի մշակութային կյանք ներգրավմանը»։
««Խարույկ» արշավական ակումբում լինելով՝ ավելի մտերմացանք։ Ժամանակի հետ խարույկի շուրջ երգեցողությունն ինքնաբերաբար մեզ դարձրեց վոկալ-գործիքային քառյակ։ Արդեն երեք տարի է¸ ինչ կանք ու երգում ենք տարբեր առիթներով։ Իսկ տուն-թանգարանում տարեցների համար ելույթը՝ մեզ նվեր էր, չէ որ նպաստեցինք ուրախ տրամադրություն ստեղծելուն։ Շնորհակալ ենք նման հնարավորության համար»¸- նշեց համերգային մասն ապահոված խմբի ֆլեյտահար Արուս Պողոսյանը։
«Gasparyan’s Artists» վոկալ խմբի գեղարվեստական ղեկավար Նելլի Գասպարյանն էլ պատիվ համարեց իր սաների հետ բարեգործական ծրագրին մասնակցելը. «Յուրաքանչյուրս է պարտավոր սերունդների միջև կապն ակտիվ պահել ու նպաստել նաև մշակութային հաստատությունների գործունեության հարստացմանը։ Այնպես որ, մեզ համար լավ առիթ էր այս ծրագրին մասնակցելը»։
Նանա Պետրոսյան