«Սովորող ուսուցիչ» առցանց վերապատրաստման հարթակի մանկավարժները կարևորում են առաջնորդ-ուսուցիչ լինելու անհրաժեշտությունը
2 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Արդի կրթական ծրագրերի ու դասագրքերի առնչությամբ մտահոգությունը մեկտեղել էր «Սովորող ուսուցիչ» առցանց վերապատրաստման հարթակի մանկավարժներին:
ԵՊՀ ֆիզիկայի ֆակուլտետում նրանք քննարկում էին վերապատրաստման այլընտրանքային ուղիներ, որոնք կարող են զարգացնել դասավանդող ուսուցիչներին ու փոխել նրանց մոտեցումը դասապրոցեսի նկատմամբ:
Ստեղծված առցանց հարթակում տեղադրվում են հետաքրքրաշարժ և զարգացնող նյութեր: «Վերապատրաստումներին և քննարկումներին կարող է մասնակցել յուրաքանչյուր ցանկացող` անկախ մասնագիտությունից: Չէ որ վերապատրաստում նշանակում է ոչ միայն առարկայական գիտելիքների հարստացում, այլ աշխարհայացքի ընդլայնում, նոր հայացք աշխարհին»,-«Արմենպրես»-ի հաղորդմամբ՝ ասաց նախաձեռնող խմբի անդամ Հասմիկ Գաբրիելյանը ԵՊՀ ֆիզիկայի ֆակուլտետում «Սովորող ուսուցիչ» ֆեյսբուքյան խմբի հանդիպում-կոնֆերանսի ժամանակ:
Խմբի ղեկավարն է ֆիզիկոս Մերուժան Հարությունյանը: Նա հավատացած է՝ ցանկացած ուսուցիչ պետք է կարողանա գրավել աշակերտին՝ հումորով, իմաստությամբ, հետաքրքիր թեմատիկ պատմություններով, պատմելու և երբեմն էլ դերասանական հմտություններով. «Ուսուցիչը պիտի լինի առաջնորդ, դերասան, նրա պատմած դասը այնքան հետաքրքրի աշակերտին, որ նա հաջորդ օրը դասարան չմտնի այդ դասը մոռացած»:
Գիտելիքը ուժ է: Պետք է սովորել ամբողջ կյանքի ընթացքում, ինչպես նաև իմացած գիտելիքներով մարդ պետք է կարողանա նոր բան ստեղծել` օգտագործելով ունեցած ներուժը: Նմանատիպ կոնֆերանսները շարունակական բնույթ են կրելու` նպատակ ունենալով երկրում փոփոխություններ մտցնել կրթական ոլորտում և լուծում տալ ծառացած մի շարք խնդիրներին:
Մելինե Մարության