ՀՀ իշխանությունները կոշտ դիրքորոշում ունեն ցանկացած երկրի կողմից Հայաստանի ներքին գործերին միջամտելու փորձի նկատմամբ. Արարատ Միրզոյան

ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ: Հայաստանի իշխանությունները կոշտ դիրքորոշում ունեն աշխարհի բոլոր երկրների կողմից երկրի ներքին գործերին միջամտելու ցանկացած փորձի տեսական հնարավորություն դիտարկելու հետ կապված: «Արմենպրես»-ի հաղորդմամբ՝ ԱԺ-ում լրագրողների հետ զրույցում նման տեսակետ հայտնեց Ազգային ժողովի նախագահ Արարատ Միրզոյանը՝ անդրադառնալով հարցին, թե արդյոք Հայաստանում ՌԴ դեսպանի՝ ՀՀ արտաքին գործերի նախարարություն հրավիրվելը և նրա հետ Հայաստանի ներքին գործերին չմիջամտելու համատեքստում զրույցը նշանակում է, թե գործող իշխանությունները կոշտացնում են դիրքորոշումը:

«Ոչ: Մենք կոշտ դիրքորոշում ունենք աշխարհի բոլոր երկրների կողմից մեր երկրի ներքին գործերին միջամտելու որևէ փորձի տեսական հնարավորություն դիտարկելու և այլնի հետ կապված: Սա շատ տեսական, նաև՝ պրակտիկ դրսևորվող դիրքորոշում է»,-ասաց Միրզոյանը: Նա տեղեկացրեց, որ Ռուսաստանի դեսպանի հետ ինքը բազմաթիվ հանդիպումներ է ունեցել, բազմաթիվ հարցեր ենք քննարկել: «Այդ թվում նաև խոսել ենք փոխադարձ ինքնիշխանությունը հարգելու մասին, մենք ՝ ռուս, ռուսական կողմը՝ հայ ժողովրդի դիրքորոշումը հարգելու մասին»,-նշեց Միրզոյանը:

Անդրադառնալով Ռուսաստանի դեսպանի՝ ՀՀ երկրորդ նախագահ Ռոբերտ Քոչարյանի հետ հանդիպմանը՝ ԱԺ նախագահը նշեց, որ անձամբ ինքը չի ողջունում հանդիպումը: «Խոսքը նրա մասին չէ, թե որևէ երկրի դեսպան չպետք է հանդիպի Հայաստանի քաղաքական դաշտի որևէ ներկայացուցչի հետ, այլ նրա մասին է, որ հանդիպում է տեղի ունենում մեկի հետ, ում նկատմամբ շատ լուրջ մեղադրանք կա առաջադրված և կա դատական գործընթաց, որի շրջանակներում որևէ հանդիպում կարող է դիտվել իբրև միջամտություն»,-պարզաբանեց Միրզոյանը:

Ավելի վաղ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը տեղեկացրել էր, որ հանձնաժողովի նիստում ՌԴ դեսպանի և Ռոբերտ Քոչարյանի միջև տեղի ունեցած հանդիպման շուրջ քննարկումից հետո, ինքը խոսել է ԱԳ նախարար Զոհրաբ Մնացականյանի հետ: Նախարարը տեղեկացրել է, որ ՌԴ դեսպանն այս առնչությամբ անցած ուրբաթ հրավիրվել է ԱԳՆ, որտեղ դեսպանի հետ տեղի է ունեցել զրույց՝ ՀՀ ներքին գործերին չմիջամտելու համատեքստում։