ԵՐԵՎԱՆ, 7 ՀՈւՆԻՍԻ, ԱՐՄԵՆՊՐԵՍ: Եվրամիությունը կարող Է պաշտպանել ԵՄ-ի կազմից Բրիտանիայի դուրս գալու նոր վերջնաժամկետի տրամադրումը Լոնդոնին այն դեպքում, եթե բրիտանական իշխանությունները չկարողանան դրա պայմանները հաստատել մինչեւ հոկտեմբերի 31-ը՝ Brexit-ի գործող ժամկետը: Այդ մասին, ինչպես տեղեկացնում Է «Արմենպրես»-ը, հունիսի 7-ին գրում Է The Times-ը՝ վկայակոչելով Եվրամիության մի աղբյուր:
Չնայած թորիների առաջնորդի պաշտոնի հիմնական թեկնածու Բրիտանիայի արտաքին քաղաքական գերատեսչության նախկին ղեկավար Բորիս Ջոնսոնի, ինչպես նաեւ այդ «մրցավազքի» մյուս մասնակիցների այն հայտարարությանը, որ Մեծ Բրիտանիան ամեն դեպքում ԵՄ-ն կլքի հոկտեմբերի 31-ին, Եվրամիության անդամ առնվազն 25 երկրներ համաձայն են երկրին ավելի երկարատեւ հետաձգում տրամադրել: «Մենք դա չենք ցանկանում, սակայն պատրաստվում ենք նրանց (Մեծ Բրիտանիային) տրամադրել նոր հետաձգում,-թերթը մեջբերել Է իր աղբյուրի խոսքը:-Վերջիվերջո ոչ ոք չի ցանկանում դառնալ այն մեկը, ով կփակի թթվածինը»:
Եվրոպական կառավարությունները, գրում Է The Times-ը, Բրիտանիայի ԱԳ նախարար Ջերեմի Հանթի հետ համակարծիք են առ այն, որ առանց գործարքի ԵՄ-ից երկրի դուրս գալու որոշումը «քաղաքական ինքնասպանություն» կդառնա նախարարների կաբինետի ղեկավարի համար: «Հավանաբար խորհրդարանում չի հավաքվի պատգամավորների մեծամասնություն, որոնք կպաշտպանեն ԵՄ-ից առանց գործարքի երկրի դուրս գալը, եւ կառավարությունը կկազմացրվի: Իսկ նոր կառավարությունը կխնդրի ժողովրդին՝ վերստին որոշում ընդունել երկրորդ հանրաքվեի անցկացման շուրջ»:
Միեւնույն ժամանակ, հրատարակության եվրոպական աղբյուրի տվյալներով, ԵՄ-ի երկրների կառավարությունների մեծամասնությունը համարում Է, որ Լոնդոնը պետք Է այսպես կոչված Brexit-ն իրականացնի մինչեւ 2020 թվականի հունիսը այն բանի կապակցությամբ, որ Եվրամիությունը պետք Է մինչեւ 2021 թվականը վերջնականապես ընդունի բյուջետային ծախսերի յոթնամյա պլանը: The Sunday Telegraph թերթը հունիսի 2-ին տեղեկացրել Է, որ Մեծ Բրիտանիայում կառավարող Պահպանողական կուսակցության առաջնորդի եւ երկրի վարչապետի պաշտոնների թեկնածու Մայքլ Գոուվը նախարարների կաբինետի անդամներին հայտարարել Է, որ պատրաստ Է Brexit-ն այս տարվա հոկտեմբերից հետաձգել մինչեւ եկող տարվա վերջը, հաղորդել Է ՏԱՍՍ-ը: