Մեյը հուսով Է, որ ԵԽ-ի ընտրությունների արդյունքները Համայնքների պալատին կհամոզեն փոխզիջման գալ Brexit-ի շուրջ

ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Մեծ Բրիտանիայի կառավարության նախագահ Թերեզա Մեյը հիասթափված Է Եվրախորհրդարանի՝ երկրում կայացած ընտրությունների արդյունքներից, սակայն հուսով Է, որ դրանք բրիտանացի պատգամավորներին կհամոզեն փոխզիջման գալ եւ հաստատել Եվրամիության կազմից Միացյալ Թագավորության դուրս գալու պայմանների վերաբերյալ համաձայնագիրը: Այդ մասին, ինչպես տեղեկացնում Է «Արմենպրես»-ը, Մեյը մայիսի 27-ին գրել Է Twitter-ի իր Էջում:

«Անցած գիշերը մեծ հիասթափություն բերեց պահպանողականներին: Հիանալի եվրապատգամավորներ կորցրեցին իրենց մանդատները, արժանավոր թեկնածուներ չկարողացան դրանք ստանալ: Այդուհանդերձ, լեյբորիստները նույնպես մեծ կորուստներ կրեցին: Դա ցույց Է տալիս՝ որքան կարեւոր Է՝ պայմանավորվածության հասնել Brexit-ի շուրջ, ես հուսով եմ, որ այդ արդյունքները կօգնեն խորհրդարանականներին՝ կենտրոնանալու այս խնդրի վրա»,-նշել Է Մեյը, որը հունիսի 7-ին կթողնի Պահպանողական կուսակցության առաջնորդի պաշտոնը այն բանից հետո, երբ երեք անգամ ապարդյուն փորձեց համոզել խորհրդարանին՝ հաստատելու Brexit-ի պայմանների շուրջ Բրյուսելի հետ իր կառավարության կողմից ձեռք բերված համաձայնագիրը:

Ինչպես արդեն տեղեկացվել Է, Brexit կուսակցությունը, որը գլխավորում Է Միացյալ Թագավորության անկախության կուսակցության (UKIP) նախկին առաջնորդ Նայջել Ֆարաջը, առաջատարն Է Եվրախորհրդարանի ընտրություններում, որոնք Մեծ Բրիտանիայում կայացել են մայիսի 23-ին: Եվրախորհրդարանի՝ իր համար առաջին ընտրություններում Brexit-ի կուսակցությունը, որը հիմնվել Է 2019 թվականի հունվարին, ապահովել Է ընտրություններին մասնակցած բրիտանացիների 31,6 տոկոսի աջակցությունը:

Կառավարող Պահպանողական կուսակցությունն ստացել Է ընտրողներիի միայն 9,1 տոկոսի ձայները եւ զբաղեցնում Է հինգերորդ տեղը: Լրջորեն նվազել Է նաեւ բրիտանական խորհրդարանում հիմնական ընդդիմադիր ուժի՝ Լեյբորիստական կուսակցության աջակցությունը, որը երրորդ տեղն Է զբաղեցնում՝ ստանալով ընտրողների 14,1 տոկոսի ձայները: Երկրորդ տեղում «Լիբերալ դեմոկրատներն» են՝ 20,3 տոկոս ձայներով, որոնք իրենց աջակցությունն ավելացրել են գրեթե երեք անգամ: Չորրորդ տեղն զբաղեցնում Է «Կանաչների» կուսակցությունը՝ 12,1 տոկոսով:

Ընտրություններին մասնակցել Է բրիտանացի ընտրողների 36,7 տոկոսը, ինչը 1,1 տոկոսային կետով ավելի Է, քան 2014 թվականին: Մեծ Բրիտանիայի համար Եվրախորհրդարանում ամրագրված Է 73 տեղ:

Նախնական արդյունքներով՝ դրանցից 28-ը կստանա Brexit-ի կուսակցությունը, 15-ը՝ լիբերալ դեմոկրատները, 10-ը՝ լեյբորիստները, 7-ը՝ «կանաչները» եւ միայն 3-ը՝ պահպանողականները: Եվս մի քանի տեղ կստանան Շոտլանդիայի, Հյուսիսային Իռլանդիայի եւ Ուելսի կուսակցությունները, հաղորդել Է ՏԱՍՍ-ը: