Թերեզա Մեյը չկարողացավ զսպել արցունքները
2 րոպեի ընթերցում
![Թերեզա Մեյը չկարողացավ զսպել արցունքները](http://armenpress.am/resized/480/static/news/b/2019/05/976081.jpg)
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: Մեծ Բրիտանիայի վարչապետ Թերեզա Մեյը հունիսի 7-ին իր առաջիկա պաշտոնաթողության մասին հայտարարելիս չկարողացավ զսպել արցունքները: Համապատասխան տեսանյութը հրապարակել Է CNN-ը, տեղեկացնում Է «Արմենպրես»-ը:
Մեյը հիշեցրել Է, որ չկարողացավ աջակցություն ապահովել Brexit-ի վերաբերյալ համաձայնագրին: «Ցավոք, ես չկարողացա դա անել: Ես փորձեցի երեք անգամ»,-նշել Է նա:
Մեյը հուզականորեն Է ավարտել Պահպանողական կուսակցության առաջնորդի պաշտոնը թողնելու մտադրության վերաբերյալ ելույթը: Ելույթի ավարտին նրա ձայնը խզվել Է, նա ընդգծել Է, որ ինքը դարձավ ընդամենը երկրորդ կինն այդ պաշտոնում Մարգարեթ Թեթչերից հետո, «բայց, իհարկե, ոչ վերջինը»:
«Ես շատ շնորհակալ եմ այն բանի համար, որ հնարավորություն ունեցա ծառայել երկրին, որը սիրում եմ»,-ասել Է նա: Դրանից հետո Մեյը կտրուկ շրջվել Է ամբիոնից եւ Դաունինգ-սթրիթ-10-ի դռնից ներս մտել: Հունիսի 7-ին պաշտոնից հեռանալը թույլ Է տալիս Մեյին որպես լիարժեք վարչապետ ընդունել ԱՄՆ-ի նախագահ Դոնալդ Թրամփին, որը հունիսի սկզբին Մեծ Բրիտանիա Է ժամանելու պետական այցով:
Նոր ղեկավարի ընտրությունների գործընթացը կսկսվի հունիսի 7-ից հետո, թեեւ այս պահին հիմնական թեկնածուն՝ արտաքին գործերի նախկին նախարար Բորիս Ջոնսոնը, արդեն հայտարարել Է իր թեկնածությունն առաջադրելու պլանների մասին: Այդ հնարավորությունը դիտարկում Է նաեւ Համայնքների պալատի նախկին առաջնորդ Անդրեա Լիդսոմը:
Հնարավոր թեկնածուների թվում նշվում են նաեւ ԱԳ նախարար Ջերեմի Հանթը եւ ներքին գործերի նախարար Սաջիդ Ջավիդը: Այնքան ժամանակ, քանի դեռ չի ընտրվել նոր ղեկավարը, իսկ այդ գործընթացը սովորաբար տեւում Է վեց շաբաթ, Թերեզա Մեյը կմնա վարչապետի ժամանակավոր պաշտոնակատար: