Մեծ Բրիտանիան պարտավոր կլինի դուրս գալ ԵՄ-ից հունիսի 1-ին, եթե հրաժարվի Եվրախորհրդարանի ընտրություններից
3 րոպեի ընթերցում
![Մեծ Բրիտանիան պարտավոր կլինի դուրս գալ ԵՄ-ից հունիսի 1-ին, եթե հրաժարվի Եվրախորհրդարանի ընտրություններից](http://armenpress.am/resized/480/static/news/b/2019/04/970870.jpg)
ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ: Մեծ Բրիտանիան պարտավոր կլինի հունիսի 1-ին լքել Եվրամիությունը, եթե հրաժարվի Եվրախորհրդարանի՝ մայիսի 23-26-ի ընտրություններից: Այդ մասին, ինչպես տեղեկացնում Է «Արմենպրես»-ը, ասված Է ԵՄ-ի 27 երկրների հայտարարության մեջ, որն ընդունվել Է Բրյուսելում կայացած արտակարգ գագաթնաժողովի արդյունքներով:
«Մինչեւ հոկտեմբերի 31-ը հետաձգման վերաբերյալ սույն որոշումը դադարում Է կիրառվել 2019 թվականի մայիսի 31-ին այն դեպքում, եթե Միացյալ թագավորությունը Եվրախորհրդարանի ընտրություններ չանցկացնի ԵՄ-ի գործող օրենսդրությանը համապատասխան եւ մինչեւ 2019 թվականի մայիսի 22-ը չվավերացնի դուրս գալու մասին համաձայնագիրը»,- նշվում Է դրանում:
Փաստաղթղում ընդգծվում Է, որ ԵՄ-ն հետաձգման ժամանակաշրջանի ընթացքում ակնալում Է Մեծ Բրիտանիայի «կառուցողական ու պատասխանատու գործելակերպը» հանրակցության կողմից որոշումների ընդունման գործընթացում: «Միացյալ Թագավորությունը պետք Է օժանդակի Եվրամիության խնդիրների կատարմանը եւ ձեռնպահ մնա ցանկացած այնպիսի միջոցառումներից, որոնք կարող են սպառնալիքի տակ դնել ԵՄ-ի նպատակների իրագործումը, մասնավորապես, որոշումների ընդունման գործընթացներում»,- նշվում Է դրանում:
Վերջին հայտարարությունն արվել Է առաջիկա եվրոպական ընտրությունների եւ Եվրահանձնաժողովի կազմի փոփոխման կապակցությամբ: Այսպես, Բրյուսելը զգուշանում Է, որ Մեծ Բրիտանիան կարող Է խոչընդոտել Եվրահանձնաժողովի եւ Եվրախորհրդի նախագահների պաշտոններում որոշակի թեկնածուների նշանակմանը: Ընդսմին ԵՀ-ի եւ Եվրախորհրդի ներկայիս ղեկավարներ Ժան Կլոդ Յունկերը եւ Դոնալդ Տուսկն ամփոփիչ մամուլի ասուլիսում ընդգծել են, որ վստահում են Լոնդոնին: Ավելի վաղ ԵՄ-ի արտակարգ գագաթնաժողովում հանրակցության 27 երկրների ղեկավարները որոշում են ընդունել Brexit-ի ամսաթիվը հետաձգել մինչեւ հոկտեմբերի 31-ը եւ իրադրությունը միջանկյալ ռեժիմով քննարկել Եվրամիության՝ հունիսին կայանալիք հերթական գագաթնաժողովում:
«ԵՄ-ի գագաթնաժողովը Մեծ Բրիտանիային ճկուն հետաձգում տրամադրեց մինչեւ հոկտեմբերի 31-ը, մինչ այդ Մեծ Բրիտանիան դեռ վեց ամիս ունի: Դա բավարար ժամանակ Է , որի ընթացքում նա կարող Է վավերացնել դուրս գալու համաձայնագիրը, այդ դեպքում հետաձգումն ինքնաբերաբար կավարտվի (եւ Մեծ Բրիտանիան ԵՄ-ից կհեռանա կազմակերպված ռեժիմով): Բայց նա կարող Է նաեւ լիովին վերանայել դուրս գալու որոշումը եւ հետ կանչել Brexit-ի վերաբերյալ ծանուցումը: Եթե նա չվավերացնի դուրս գալու համաձայնագիրը, այդժամ մեզ սպասում Է «կոշտ» Brexit առանց գործարքի»,- հայտարարել Է Եվրախորհրդի նախագահ Դոնալդ Տուսկը, հաղորդել Է ՏԱՍՍ-ը: