1 րոպեի ընթերցում
ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանի կարծիքով՝ թիմը Եվրոպայի առաջնության է մեկնում մեդալների համար պայքարելու:
«Եվրոպայի առաջնությանը մեկնում ենք հիմնականում երիտասարդ կազմով, բայց այն ձևավորվել է Հայաստանի առաջնության արդյունքում: Եվրոպայի այս առաջնությունում մեր երիտասարդ մարզիկները կկարողանան փորձ ձեռք բերել աշխարհի առաջնությունում հաջող հանդես գալու նպատակով, որը վարկանիշային է Տոկիոյի 2020 թվականի Օլիմպիական խաղերի համար: Իհարկե, մենք մեկնում ենք այս առաջնությանը մեդալների համար պայքարելու»,-«Արմենպրես»-ի հաղորդմամբ` լրագրողների հետ զրույցում ասաց մարզիչը:
Կուրղինյանի խոսքով` հուսադրող է, որ երիտասարդները հեռանկարային են: «Փորձելու ենք մինչև Տոկիոյի Օլիմպիական խաղերը ձևավորել լավ հավաքական»,- եզրափակեց մասնագետը:
Եվրոպայի այս տարվա առաջնությունում Հայաստանը ներկայացնում են 9 մարզիկներ: