397.35
Ձեր աշխատանքը կենսակա՛ն կարևորություն ունի. Երևանի քաղաքապետ Մարությանի ուղերձը Թատրոնի համաշխարհային օրվա առթիվ
2 րոպեի ընթերցում
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Երևանի քաղաքապետ Հայկ Մարությանն ուղերձ է հղել Թատրոնի համաշխարհային օրվա կապակցությամբ։ Այս մասին «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից։
«Թատերարվեստի հարգելի գործիչներ,
Մենք իրավացիորեն հպարտանում ենք, որ մենք մշակութային ազգ ենք, որ մեր թատրոնն ավելի քան երկու հազար տարվա պատմություն ունի: Այո, ոչ ոք չի կարող հերքել, որ երկու հազար տարի առաջ Հայաստանում անտիկ թատերախմբեր էին գործում. սա պատմական փաստ է: Փաստ է նաև, որ մեր թատրոնը հատկապես վերջին երկու հարյուր տարիներին բուռն զարգացում է ապրել, ու մեր թատերական գործիչները հարստացրել են ոչ միայն ազգային, այլեւ հարեւան ժողովուրդների ու երկրների թատերարվեստը:
Այնուհանդերձ, ես չեմ կարծում, որ մենք պետք է բավարարվենք պատմության կողմից մեզ շռայլորեն կտակված դափնիներով: Ես համոզված եմ, որ հարուստ ժառանգությունը առավելևս պարտավորեցնում է՝ ամեն օր զարգացնելու մեզ ավանդված արժեքները՝ վերցնելով աշխարհից մեր բաժինը ու աշխարհին տալով մերը:
Սիրելի բարեկամներ,
թույլ տվեք շնորհակալություն հայտնել թատրոնի աշխարհում ներգրավված բոլոր մարդկանց՝ այդ թվում, իհարկե, ձեր հանդիսատեսին:
Խնդրում եմ, փոխանցեք նրանց իմ շնորհավորանքներն ու անկեղծ մաղթանքները Թատրոնի համաշխարհային օրվա կապակցությամբ: Ձեր աշխատանքը մեզ համար կենսակա՛ն կարևորություն ունի»,- նշված է ուղերձում:
Բաժանորդագրվեք մեր ալիքին Telegram-ում