Բրիտանական խորհրդարանը Brexit-ի համաձայնագրի 16 այլընտրանք է առաջարկել. The Guardian

ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Մեծ Բրիտանիայի խորհրդարանի պատգամավորներն ընդհանուր առմամբ 16 այլընտրանք են առաջարկել Brexit-ի պայմանների վերաբերյալ Եվրամիության հետ համաձայնագրի՝ այդպես Էլ իրենց հավանությանը չարժանացած նախագծի համար: Ինչպես մարտի 26-ի երեկոյան իր Twitter-ում գրել Է The Guardian թերթի քաղաքական մեկնաբան Հեզեր Սթյուարտը, մարտի 27-ին օրենսդիրները պետք Է մի շարք քվեարկություններ անցկացնեն այն առաջարկությունների շուրջը, որոնք կընտրի Համայնքների պալատի խոսնակ Ջոն Բերքոուն, տեղեկացնում Է «Արմենպրես»-ը:

Ինչպես գրում Է Սթյուարտը, Բերքոուին հանձնված տարբերակների թվում են՝ Brexit-ի շուրջը երկրորդ հանրաքվեի անցկացումը, Եվրամիության կազմից երկրի դուրս գալուց հրաժարումը, Միացյալ Թագավորության անդամակցումը Եվրոպայի ազատ առեւտրի ասոցիացիային, ինչպես նաեւ Brexit-ը, որը ենթադրում Է Մեծ Բրիտանիայի սերտ համագործակցությունը ԵՄ-ի հետ:

Մարտի 25-ին բրիտանացի պատգամավորներն ընդունել են պահպանողական Օլիվեր Լեթուինի ուղղումը, որը Համայնքների պալատին թույլ կտա մարտի 27-ին արտահայտվել վարչապետ Թերեզա Մեյի պլանի տարբեր այլընտրանքների օգտին: Քվեարկությունները պարտադիր ուժ չեն ունենա կառավարության համար, որը Brexit-ի գործընթացի նկատմամբ վերահսկողությունը խլելու խորհրդարանի փորձը «վտանգավոր նախադեպ» Է որակել, սակայն կուժեղացնեն ճնշումը Թերեզա Մեյի կաբինետի վրա, հաղորդել Է ՏԱՍՍ-ը: