Սասուն Միքայելյանը ԵԿՄ ղեկավարի պաշտոնում ընտրվելու դեպքում պատրաստվում է շարունակել Վազգեն Սարգսյանի գործը
1 րոպեի ընթերցում
![Սասուն Միքայելյանը ԵԿՄ ղեկավարի պաշտոնում ընտրվելու դեպքում պատրաստվում է շարունակել Վազգեն Սարգսյանի գործը](http://armenpress.am/resized/480/static/news/b/2019/03/966445.jpg)
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: Երկրապահ կամավորական միության ղեկավարի պաշտոնում ընտրվելու դեպքում «Իմ քայլը» խմբակցության անդամ Սասուն Միքայելյանը պատրաստվում է շարունակել ՀՀ ազգային հերոս, սպարապետ Վազգեն Սարգսյանի գործը:
«Արմենպրես»-ի փոխանցմամբ` այս մասին Միքայելյանը հայտնեց մարտի 5-ին, Եռաբլուրում լրագրողների հետ զրույցում:
«Եթե ես ընտրվեմ ԵԿՄ նախագահ, կսկսեմ այնտեղից, որտեղ Վազգենի կյանքը վերջացավ: Երկրապահը չի խանգարի իշխանությանը, երբեք էլ չի դառնա իշխանության կցորդ: Երկրապահը ժողովրդից ծոցից ծնված մարդիկ են, երկրապահը ժողովրդի կողմից է միշտ եղել ու պետք է լինի»,- ասաց Սասուն Միքայելյանը:
Փետրվարի 11-ին ԵԿՄ-ում տեղի ունեցած հավաքի անդամները միաձայն որոշել են պատրաստվել արտահերթ համագումարի՝ առաջադրելով «Սասուն» կամավորական ջոկատի հրամանատար, ԱԺ պատգամավոր Սասուն Միքայելյանի թեկնածությունը:
ԵԿՄ անդամ, Վազգեն Սարգսյանի եղբայր Արամ Սարգսյանը, Երկրապահ կամավորականների միությունում իր առաքելությունն այս փուլում համարելով ավարտված, նշել է, որ ԵԿՄ-ն այսօր բացառիկ հնարավորություն ունի համախմբվելու: Նա նաև բացառել է ԵԿՄ ղեկավարի դերում իր առաջադրումը: