60 տարի առաջ ծնվեց Վազգեն անունով մի հրաշք մանուկ. նախագահ Արմեն Սարգսյանը հարգանքի տուրք մատուցեց սպարապետի հիշատակին
1 րոպեի ընթերցում
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: Սպարապետ Վազգեն Սարգսյանը 20-րդ դարի վերջի ու 21-րդ դարի սկզբի մեր պատմության հսկաներից մեկն է:
«Արմենպրես»-ի փոխանցմամբ` այս մասին մարտի 5-ին Եռաբլուր զինվորական պանթեոնում լրագրողների հետ զրույցում ասաց ՀՀ նախագահ Արմեն Սարգսյանը:
«Այսօր ինչ-որ իմաստով տխուր օր է, որն իրականում հսկայական ուրախության օր է: Սրանից 60 տարի առաջ Արարատյան դաշտի փոքրիկ գյուղում ծնվել է մի հրաշք մանուկ, որի անունը եղել է Վազգեն: Այդ հրաշք մանուկը հոյակապ հայկական ընտանիքում ստացել է իսկապես հայեցի կրթություն: Եվ ամեն օր իր պատուհանից տեսել է իր երազանքը` Մասիս սարը: Այդ հրաշք մանուկը 20-րդ դարի վերջի և 21-րդ դարի հսկաներից մեկն է` սպարապետ Վազգեն Սարգսյանը: Այսօր տոնում ենք իր ծննդյան 60-ամյակը: 10 տարի հետո կտոնենք 70, հետո 80, 90 և 100-ամյակները, բայց միշտ կմնա երիտասարդ 40 տարեկան Վազգեն Սարգսյանը, մեր ազգային հսկաներից մեկը»,- ասաց նախագահը:
Անդրադառնալով հոկտեմբերի 27-ին Ազգային ժողովում տեղի ունեցած իրադարձությանը, որի արդյունքում զոհվեց Վազգեն Սարգսյանը, նախագահը նշեց, որ այն հսկայական ողբերգություն է մեր ազգային պատմության մեջ և համապատասխան արժանի գնահատականը պետք է ստանա: