Արմեն Գրիգորյանն ընդունել է THALES Group ընկերության փոխնախագահ և տարածաշրջանային տնօրեն Փոլ Ռեմիին
1 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Հայաստանի անվտանգության խորհրդի քարտուղար Արմեն Գրիգորյանն ընդունել է THALES Group ընկերության փոխնախագահ և տարածաշրջանային տնօրեն Փոլ Ռեմիին:
Ինչպես «Արմենպրես»-ին տեղեկացրեց անվտանգության խորհրդի քարտուղարի մամուլի խոսնակ Արեգ Քոչինյանը, ԱԽ քարտուղարը ներկայացրել է կիբերանվտանգության ապահովման, տիեզերքի խաղաղ օգտագործման մասին օրենսդրական կարգավորումների և հայկական տիեզերական ծրագրի մեկնարկի ուղղությամբ իրականացվող աշխատանքները:
Փոլ Ռեմին իր հերթին ներկայացրել է THALES Group ընկերության գործունեությունը նշելով, որ կազմակերպությունը հետաքրքրված է Հայաստանի շուկայում այժմ առաջ եկող հնարավորություններով և տեղական կազմակերպությունների ու պետական մարմինների հետ համագործակցությամբ:
Հանդիպման ընթացքում կողմերը մտքեր են փոխանակվել փոխշահավետ համագործակցության հնարավորությունների վերաբերյալ:
Հանդիպմանը ներկա է գտնվել նաև ՀՀ նախագահի խորհրդական Շահեն Ավագյանը:
THALES Group ընկերությունը զբաղվում է էլեկտրոնային համակարգերի նախագծմամբ ու կառուցմամբ, ծառայություններ է մատուցում պաշտպանական, տրանսպորտային և անվտանգության շուկաներում: