Թուրքական ազգայնական «Մեծ միասնություն» կուսակցության առաջնորդը հանդես է եկել հայերի վերաբերյալ բացահայտ ֆաշիստական հայտարարությամբ

ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Թուրքական ծայրահեղ ազգայնական «Մեծ միասնություն» կուսակցության (BBP) առաջնորդ Մուստաֆա Դեսթիջին բացահայտ ֆաշիստական պահվածք է դրսևորել՝ առաջարկելով «արտաքսել Թուրքիայում ոչ օրինական աշխատող հայերին»:

Այս մասին, ինչպես հաղորդում է «Արմենպրես»-ը, հայտնում է թուրքական mynet.com-ը:

Դեսթիջիի նման հայտարարության համար պատճառ է հանդիսացել Ֆրանսիայի նախագահ Էմանուել Մակրոնի` ապրիլի 24-ը Ֆրանսիայում Հայոց ցեղասպանության հիշատակի ազգային օր հռչակելու մասին հայտարարությունը:

Դեսթիջին անդրադարձել է նաև Ֆրանսիային և մեղադրել ցեղասպանություններ գործելու մեջ:

Ֆրանսիայի նախագահ Էմանուել Մակրոնն ապրիլի 24-ըհայտարարել է Հայոց ցեղասպանության հիշատակի ազգային օր: Այս մասին նա հայտարարել է Փարիզում հայ համայնքի ամենամյա ընթրիքի ժամանակ: Ֆրանսիայի հայկական կազմակերպությունների համակարգող խորհրդի ամենամյա ընթրիքը կայացել է փետրվարի 5-ին: Ապրիլի 24-ը Հայոց ցեղասպանության զոհերի հիշատակի ազգային օր հռչակել Մակրոնը խոստացել էր իր նախընտրական քարոզարշավի ընթացքում։ Ընթրիքին Մակրոնը նաև հարգանքի տուրք է մատուցել աշխարհահռչակ շանսոնյե Շառլ Ազնավուրի հիշատակին:

Ֆրանսիան Հայոց ցեղասպանությունը ճանաչել է 2001թ. օրենքի ուժով, իսկ 2016թ. քրեականացրել է Հայոց ցեղասպանության ժխտումը: