ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: ՀՀ ազգային ժողովի Պետական-իրավական հարցերի մշտական հանձնաժողովի նախագահ Վլադիմիր Վարդանյանը կառավարության արդեն ներկայացված ծրագրի նախագիծը համարում է ապագային միտված ծրագիր: Նա դրանում տեսնում է արտաքին և ներքին կյանքին վերաբերող գրեթե բոլոր հարցերը:
«Արմենպրես»-ի հաղորդմամբ` «Իմ քայլը» խմբակցության պատգամավոր, հանձնաժողովի նախագահ Վարդանյանը նման տեսակետ հայտնեց խորհրդարանում լրագրողներ հետ զրույցում:
«Կառավարության ծրագիրը հայեցակարգային փաստաթուղթ է, այն չի կարող ներառել բոլոր ընթացակարգերը: Իմ կարծիքով, դրանում քննարկված են ներքին և արտաքին կյանքին վերաբերող գրեթե բոլոր հարցերը: Կան որոշակի հարցեր, որոնք ևս լավ կլիներ, որ տեղ գտնեին: Սակայն կառավարությունը գուցե փորձի դա իրականացնել աշխատանքային կարգով հետագայում»,-ասաց Վարդանյանը:
Նա նշեց, որ, մասնավորապես, մի շարք հարցեր կային «Իմ քայլը» կուսակցության նախընտրական ծրագրում, որոնք որոշակի առումով արտացոլում չեն գտել կառավարության ծրագրի նախագծում:
Վարդանյանը նկատեց, որ թեև «անցումային արդարադատություն» եզրույթը ծրագրում չի օգտագործվում, սակայն դրա վերաբերյալ որոշակի նշումներ կան: Անցումային արդարադատության որոշակի դրվագներին, հարցերին նվիրված դրույթներ են պարունակվում:
Նրա կարծիքով, ծրագիրն ապագային միտված փաստաթուղթ է:
Կառավարությունն իր ծրագիրը ներկայացրել է փետրվարի 6-ի նիստում և հաստատել։ ՀՀ սահմանադրության 151-րդ հոդվածի 2-րդ մասի համաձայն` ԱԺ-ն Կառավարության ծրագրին հավանություն է տալիս յոթնօրյա ժամկետում` պատգամավորների ընդհանուր թվի ձայների մեծամասնությամբ: