368.54
Կամերային նվագախմբի «Իտալական մոտիվներ» համերգին հանդես է եկել դաշնակահար Ռիտա Կուչեն
2 րոպեի ընթերցում
ԵՐԵՎԱՆ, 28 ՀՈՒՆՎԱՐԻ, ԱՐՄԵՆՊՐԵՍ: «Իտալական մոտիվներ» խորագրով համերգային ծրագրում, որը տեղի է ունեցել հունվարի 26-ին Կոմիտասի անվան կամերային երաժշտության տանը, Հայաստանի պետական կամերային նվագախումբը դիրիժոր Հարություն Արզումանյանի ղեկավարությամբ հնչեցրել է Մոցարտի, Վիվալդիի, Ռեսպիգիի, Ռոսսինիի ստեղծագործությունները։ Մեկնարկին ներկաները մեկ րոպե լռությամբ հարգել են կոմպոզիտոր, դաշնակահար, դիրիժոր Միշել Լեգրանի հիշատակը:
«Արմենպրես»-ի հաղորդմամբ` երեկոյին ելույթ է ունեցել դաշնակահար Ռիտա Կուչեն (Իտալիա), ով որպես մենակատար հանդես է գալիս Իտալիայում և ամբողջ աշխարհում մի շարք կարևոր նվագախմբերի հետ:
«Շատ ուրախ եմ, որ ստացա այստեղ հանդես գալու հրավերը, ուրախ եմ, որ ելույթ ունեցա Հայաստանի պետական կամերային նվագախմբի հետ: Մոցարտն իմ սիրելի կոմպոզիտորն է: Մոցարտի այս կոնցերտը շատ գեղեցիկ է, բայց բարդ գործ է»,-նշել է դաշնակահարուհին:
Երեկոն իրենց ներկայությամբ պատվել են արտակարգ և լիազոր դեսպաններ, պաշտոնատար այրեր, արվեստագետներ: Միջոցառումն անցել է Կամերայինի տաք և հյուրընկալ լեփ-լեցուն դահլիճում՝ հանդիսատեսի ջերմ ծափահարությունների ներքո:
Համերգային ծրագիրն իրականացրել է Կամերային երաժշտության ազգային կենտրոնը՝ Հայաստանում Իտալիայի դեսպանատան հետ համատեղ:
Բաժանորդագրվեք մեր ալիքին Telegram-ում