2 րոպեի ընթերցում
ԵՐԵՎԱՆ, 21 ՀՈՒՆՎԱՐԻ, ԱՐՄԵՆՊՐԵՍ:Ուկրաինայի մայրաքաղաք Կիևում անցկացվող Հայկական մշակույթի շաբաթի շրջանակում մի շարք միջոցառումներ նվիրված են Կոմիտասի 150, Սիլվա Կապուտիկյանի 100 և Սերգեյ Փարաջանովի 95-ամյա հոբելյաններին:
«Արմենպրես»-ի փոխանցմամբ` այդ մասին հաղորդում է AnalitikaUA.net-ը:
Գրականության, երաժշտության, կինոյի երկրպագուների շրջանում մեծ հետաքրքրություն առաջացրած շաբաթն իրականացվում է հունվարի 19-25-ը:
Կազմակերպիչների խոսքով`հայ գործիչների ստեղծագործությունները ներկայացված են Օշեր Շվարցմանի անվան, Ժողովուրդների բարեկամության գրադարաններում և Կինոյի տանը: Միջոցառումների ծրագիրը ներառում է համերգներ, ցուցահանդեսներ, վարպետության դասեր, գրական և երաժշտական երեկոներ ու կինոդիտումներ՝ նվիրված հայ մշակույթի ակնառու գործիչներին:
«ԱՕԿՍ-Ուկրաինա» մշակութային կապերի հայկական միության ղեկավար Ելենա Հովհաննիսյանը պարբերականին հաղորդել է, որ միջոցառումների կազմակերպիչներն են «ԱՕԿՍ-Ուկրաինա» մշակութային կապերի հայկական միությունը, Parajanov-ART-ը, Պոդոլսկի շրջանի պետական վարչակազմի մշակույթի, զբոսաշրջության և մշակութային ժառանգության պահպանման բաժինը, Կիևի հրեական համայնքի ստեղծագործական նախաձեռնությունների կենտրոնը:
Ավելի վաղ հայտարարվում էր, որ Ուկրաինայի հայերի միությունն ակտիվ աշխատում է ազգային պատմամշակութային արժեքների ճանաչման ուղղությամբ: Կազմակերպության ղեկավար Վիլեն Շատվորյանը նշել է՝ մեր ականավոր հայրենակիցների գործերը շարունակում են ուրախացնել արվեստը գնահատողներին: