Կառավարությունը հաստատեց սեյսմիկ անվտանգության առումով խոցելի 26 գերակա դպրոցների ցանկը. դրանք կվերակառուցվեն, կամ կկառուցվեն նորերը
2 րոպեի ընթերցում
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Հանրապետությունում սեյսմիկ անվտանգության առումով խոցելի և կրթական գործընթացի համար անհրաժեշտ քաղաքաշինական բարելավման ենթակա է համարվել 425 պետական հանրակրթական դպրոց:
Ծրագրի շրջանակում նախատեսված է 46 դպրոցների ուժեղացում կամ նորերի կառուցում: Կառավարության նիստում Տարածքային զարգացման նախարարի պաշտոնակատար Սուրեն Պապիկյանը նշեց, որ գործադիրի որոշմամբ արդեն իսկ հաստատվել է 20 դպրոցների ցանկը։
Ըստ նրա՝ ներկայումս շինարարություն է իրականացվում 6 դպրոցներում՝ Վանաձորի թիվ 7 հիմնական դպրոցում, Երևանի թիվ 135 և 153 հիմնական դպրոցներում, Կապանի թիվ 7 հիմնական դպրոցում, Նոր Խարբերդի թիվ 1 միջնակարգ դպրոցում և Գավառի թիվ 2 միջնակարգ դպրոցում: Հաստատված 20 դպրոցներից` 5 դպրոցների նախագծանախահաշվային փաստաթղթերը մշակվել են և գտնվում են փորձաքննության փուլում (Երևանի թիվ 6, 18 և 51 դպրոցներ, Հերացու անվան ավագ դպրոց, Կոջոյանի անվան թիվ 15 կրթահամալիր):
«Սեյսմիկ անվտանգության առումով խոցելի 26 գերակա դպրոցների ցանկը խնդրում եմ հաստատել և ապահովել կա՛մ վերակառուցումը կամ ամբողջությամբ կառուցումը»,- «Արմենպրես»-ի փոխանցմամբ, ասաց Պապիկյանը: Առաջին փոխվարչապետ Արարատ Միրզոյանն էլ նշեց, որ նոր դպրոցներ կառուցելիս որդեգրվել է մի մոտեցում, որ պետք է կառուցվեն մոդուլային դպրոցներ: Նրա խոսքով, դրանք եւ էսթետիկապես ավելի լավն են, եւ հոգեբանական մթնոլորտը շատ ավելի նպաստավոր է կրթության եւ երեխաների աշխարհընկալման զարգացման համար նույնիսկ գունային լուծումների առումով:
«Կախված աշակերտների թվից, համայնքից, մոդուլներով կարող են զանազան կառույցներ հավաքվել: Գիտեք, որ ունենք ռազմավարություն՝ կենտրոնացնել համայնքային կյանքը դպրոցների շուրջը, ոչ միայն դպրոցական, այլեւ մշակութային, սպորտային կյանքը: Մոդուլային տարբերակը այս նպատակին է ծառայելու: Ունենք նաեւ որոշում, միայն ծայրահեղ անհնարինության դեպքում կառուցել ավանդական դպրոցներ»,-ասաց Արարատ Միրզոյանը: