1 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Արամի 23 հասցեում՝ պատմամշակութային հուշարձան հանդիսացող «Հայաստանի փոքրիկ երգիչներ» երգչախմբի շենքը խարխլված է, բայց հնարավոր է փրկել:
«Արմենպրես»-ի հաղորդմամբ` այս մասին Երևանի քաղաքապետարանում լրագրողների հետ հանդիպմանը հայտարարեց Երևանի գլխավոր ճարտարապետ Արթուր Մեսչյանը: Նրա խոսքով`շենքի համար ժամանակավոր ամրացման տարբերակ է առաջարկվել: «Երեխաներին կոչ եմ անում ժամանակավորապես կառույց չմտնել: Վերակառուցման աշխատանքները մարդկանց տեղափոխվելուց հետո հնարավոր կլինի սկսել»,-ասաց նա՝ հավելելով, որ հանգիստ է այդ առումով, քանի որ կառույցը չի քանդվելու: «Փրկվելիք է: Եթե ես ասում եմ, որ չեմ քանդելու, ուրեմն չեմ քանդելու»,-հավելեց նա:
Երևանի գլխավոր ճարտարապետը չկիսեց նաև այն վրդովմունքը, որ քաղաքացիները ունեին Հյուսիսային պողոտայի հետ կապված: «Հյուսիսային պողոտան դարձել է երևանցիների ամենասիրված վայրը»,-ընդգծեց Մեսչյանը: