Նախարարի պաշտոնակատարը հաստատում է, որ կան խորհրդարանական ընտրություններին սպասող ներդրողներ
1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ տնտեսական զարգացման և ներդրումների նախարարի պաշտոնակատար Տիգրան Խաչատրյանը համամիտ է այն դիտարկմանը, որ շատ պոտենցիալ ներդրողներ ներդրումներ կատարելու համար սպասում են Հայաստանում խորհրդարանական ընտրությունների արդյունքներին:
«Արմենպրես»-ի հաղորդմամբ`նա այս մասին ասաց ԱԺ-ում լրագրողների հետ զրույցում:
«Ես համաձայն եմ Նիկոլ Փաշինյանի այն դիտարկմանը, որ ներդրողները սպասում են խորհրդարանական ընտրություններին: Կլինի անպայման ներդրումային որոշումների արագացում»,-ասաց նախարարի պաշտոնակատարը:
Նա շեշտեց՝ ակնհայտ է, որ շատերը սպասում են ընտրությունների արդյունքներին:
Նախարարի պաշտոնակատարի խոսքով՝ գնահատվում է, որ համախառն կուտակումը տնտեսության մեջ մյուս տարի կաճի վեց տոկոսով, դա նշանակում է, որ մոտավորպես հանրագումարով կհասնի տասնինը տոկոսի:
Խաչատրյանը փաստեց, որ ներդրողների ցանկությունների մակարդակում քննարկումներ միշտ լինում են: Հիմնական ներդրումները մասնավոր ներդրումներն են:
Նախարարի պաշտոնակատարը նկատեց, որ բոլոր ներդրումային գործողություններն իրականացվում են այնտեղ, որտեղ կանխատեսելիություն կա: