Նաոմի Ուոթսն առաջինն Է դեր ստացել «Գահերի խաղը» պրիկվելում
2 րոպեի ընթերցում
![Նաոմի Ուոթսն առաջինն Է դեր ստացել «Գահերի խաղը» պրիկվելում](http://armenpress.am/resized/480/static/news/b/2018/10/952876.jpg)
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Ամերիկացի դերասանուհի Նաոմի Ուոթսը նկարահանվելու Է «Գահերի խաղը» ֆենթեզի սերիալի ապագա սփին-օֆֆում: Այդ մասին, ինչպես տեղեկացնում Է «Արմենպրես»-ը, հայտնել Է The Hollywood Reporter-ը՝ վկայակոչելով HBO հեռուստաալիքը:
Ուոթսը դարձել Է առաջին դերասանուհին, որը պաշտոնապես տեղ Է գտել պրիկվելի դերասանական կազմում: Նրա դերն առայժմ չի բացահայտվում: HBO-ի ներկայացուցիչների խոսքով՝ նա մարմնավորելու Է «խարիզմատիկ բարձրաշխարհիկ ազդեցիկ կնոջ»: Ուոթսի հերոսուհու անունը նույնպես գաղտնի Է պահվում:
Պրիկվելի գործողությունը ծավալվում Է «Գահերի խաղի» իրադարձություններից տասը հազար տարի առաջ, եւ ֆենթեզի սերիալի ոչ մի հերոս դրանում չի հայտնվի: Որպես նախագծի գործադիր պրոդյուսեր հանդես Է եկել Ջեյն Գոլդմանը, որը գրող Ջորջ Մարտինի հետ համատեղ նաեւ զբաղվում Է սցենարը գրելով:
50-ամյա Նաոմի Ուոթսը հայտնի Է այնպիսի ֆիլմերից, ինչպիսիք են՝ «Մալհոլանդ Դրայվ», «Բերդմեն», «Նախշազարդված քողը», «21 գրամ», «Քինգ Քոնգ», «Զանգ-2», «Զվարճալի խաղեր» ժապավենները եւ «Դիվերգենտ»-ի սերիաները: «Գահերի խաղը» HBO ալիքով թողարկվում Է 2011 թվականից: Սերիալի ութերորդ՝ եզրափակիչ մասի նկարահանումներն ավարտվել են հուլիսի սկզբին: Սեզոնի պրեմիերան պլանավորված Է 2019 թվականի գարնանը: