Ապահովելով էներգետիկ համակարգի կայուն զարգացումը՝ կունենանք տնտեսության բավականին մեծ աճ. Գարեգին Բաղրամյան
1 րոպեի ընթերցում
ԵՐԵՎԱՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության էներգետիկ ենթակառուցվածքների և բնական պաշարների նորանշանակ Գարեգին Բաղրամյանը խոստանում է ամեն ինչ անել Հայաստանի էներգետիկ համակարգի արդյունավետ զարգացումն ապահովելու համար:
Ինչպես հաղորդում է «Արմենպրես»-ը նախարարության աշխատակազմի հետ հանդիպմանը Գարեգին Բաղրամյանն ընդգծեց, որ էներգետիկ համակարգն ամբողջ երկրի տնտեսության շատ կարևոր մասն է: «Ապահովելով էներգետիկ համակարգի կայուն զարգացումը՝ կունենանք նաև տնտեսության բավականին մեծ աճ: Ամեն ինչ պետք է անենք: Կան ծրագրեր: Չհաջողելու իրավունք չունենք: Կարծում եմ, որ պետք է ապացուցեմ, որ նշանակման մեջ չեք սխալվել, պարոն վարչապետ»,- ասաց նախարարը:
Բաղրամյանը նաև շնորհակալություն հայտնեց ՀՀ էներգետիկ ենթակառուցվածքների և բնական պաշարների նախկին նախարար Արթուր Գրիգորյանին և նախարարության աշխատակազմին անցած ամիսների համատեղ աշխատանքի համար:
ՀՀ վարչապետ Նիկոլ Փաշինյանն էլ հավելեց, որ ոլորտի պրոֆեսիոնալ ներուժը՝ անկախ քաղաքական կողմնորոշումներից, քաղաքական անցյալից, պետք է համախմբվի՝ զարգացման ծրագրեր մշակելու և իրականացնելու համար: