ԱԱԾ-ն վերջին 100 օրվա ընթացքում պետբյուջե է վերականգնել 2017-ի ցուցանիշից 8-9 անգամ ավելի գումար
1 րոպեի ընթերցում
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ: Ազգային անվտանգության ծառայությունը վերջին 100 օրում գրանցել է մեծ ձեռքբերումներ: Կառավարության նիստից հետո լրագրողների հետ զրույցում նման համոզմունք հայտնեց ԱԱԾ տնօրեն Արթուր Վանեցյանը:
«Իմ ղեկավարած կառույցը մեծ ձեռքբերումներ է ունեցել: Այս 100 օրվա ընթացքում պետբյուջե վերականգնված գումարի չափը 8-9 անգամ գերազանցում է ամբողջ 2017 թվականին վերականգնվածի չափը»,- ասաց ԱԱԾ տնօրենը:
«Արմենպրես»-ի փոխանցմամբ, Վանեցյանը, միաժամանակ, հրաժարվեց անդրադառնալ ԱԱԾ-ի նախկին գործունեությանը և նշեց, որ կարող է խոսել միայն 2018-ի մայիսի 10-ից սկսած գործունեության մասին: «Ես քաղաքական գործիչ չեմ և քաղաքական հայտարարություններ առհասարակ չեմ անում»,- ընդգծեց նա:
Հարցին, թե ինչով է պայմանավորված ԱԱԾ-ի արդյունավետ աշխատանքը՝ Աթուր Վանեցյանը պատասխանեց՝ նոր աշխատանքով, վարչապետի և նոր կառավարության մոտեցումներով:
