Դատախազությունը Քոչարյանի կալանավորումը վերացնելու որոշումը ստանալուց հետո կներկայացնի դրան համահունչ բողոք
2 րոպեի ընթերցում
ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Գլխավոր դատախազությունը ՀՀ երկրորդ նախագահ Ռոբերտ Քոչարյանին կալանավորումը վերացնելու Վերաքննիչ դատարանի որոշումը ստանալու հետո դրան համահունչ բողոք կներկայացնի: Ինչպես հաղորդում է «Արմենպրես»-ը, այս մասին գլխավոր դատախազության շենքի դիմաց հավաքված քաղաքացիների հետ հանդիպմանն ասաց ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության պետ Վահագն Մուրադյանը:
«Մենք արդեն հայտարարություն տարածել ենք, որ Վերաքննիչ դատարանի որոշումը դեռ չենք ստացել: Մենք մեկ-երկու օրվա ընթացքում այդ որոշումը կստանանք, այդ հարցը կքննարկենք և որոշման մեջ նշված հարցերին համահունչ բողոք կտանենք»,- ասաց Մուրադյանը:
Նա հավելեց, որ Վերաքննիչ դատարանում դատախազությունն իր դիրքորոշումն արտահայտել է, իսկ որոշումը ստանալուց հետո համահունչ բողոք կտանեն:
«Դատախազությունը մտադրություն ունի արդյոք Վճռաբեկ դատարան բողոք ներկայացնելու»,- հարցին ի պատասխան Մուրադյանը նշեց, որ նման մտադրությունդատախազությունն ունի, սակայն պետք է որոշմանը ծանոթանան, որպեսզի բողոքը լինի դրան համահունչ:
Վահագն Մուրադյանը հրաժարվեց մեկնաբանել ՀՔԾ-ի հայտարարությունն այն մասին, որ Ռոբերտ Քոչարյանի կալանավորումը վերացնելու Վերաքննիչ դատարանի որոշումն ապօրինի է: Մուրադյանը հստակեցրեց, որ ինքը միայն լիազորված է տեղեկացնել, որ գլխավոր դատախազությունը կստանա Վերաքննիչ դատարանի որոշումը, կքննարկի, դրան համահունչ բողոք կներկայացնի: