Դաշնակցությունը ներկայացրեց սոցիալ-տնտեսական քաղաքականության հիմնադրույթների սեփական նախագիծը
2 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: ՀՅԴ կուսակցությունը մշակել է սոցիալ-տնտեսական քաղաքականության հիմնադրույթների սեփական նախագիծը:
«Արմենպրես»-ի փոխանցմամբ` այս մասին օգոստոսի 10-ին նախագծի շնորհանդեսի ընթացքում հայտնեցին ՀՅԴ Բյուրոյի ներկայացուցիչները:
«Մինչ այժմ գործող բոլոր իշխանությունները ազատական քաղաքականության կրողներ են եղել, և դրոշակ է դարձել «Պետությունը վատ տնտեսավարող է, պետությունը պետք է հեռու մնա» խոսքը: Մենք այդ մոտեցմանը դեմ ենք: Երբ ունենք շուկայի ձախողում, այդ դեպքում պետությունը պետք է ինքը տնտեսական գործունեություն իրականացնի»,- նշեց Գյուղատնտեսության նախարար Արթուր Խաչատրյանը:
Տնտեսական զարգացման և ներդրումների նախարար Արծվիկ Մինասյանի խոսքով` այս նախագիծը չէր կարող հակասել Դաշնակցության նախորդ ծրագրերին: «ՀՅԴ սոցիալ-տնտեսական քաղաքականության հիմնադրույթները» նախագծի նպատակը այս հարցում դաշնակցության տեսլականը ներկայացնելն է:
«Այն օրենսդրական փոփոխությունները, որոնք առաջիկայում սպասում են, վկայությունն են այն բանի, որ մեր կողմից առաջ քաշված մոտեցումները ճիշտ են: Դրանք վերաբերում են գնագոյացման արդար համակարգից մինչև եկամուտների վերաբաշխման քաղաքականությանը»,- ասաց Արծվիկ Մինասյանը:
Նախարարների խոսքով` իրենք որոշ հարցերի շուրջ համախոհություն ունեն կառավարության մյուս անդամների հետ, բայց իրենց գաղափարներն ամբողջապես իրականություն դարձնելու համար գործադիրում լիարժեք մեծամասնություն է հարկավոր:
Նախագիծն այսօրվանից կներկայացվի հանրության դատին: Շուրջ երկու ամսվա հանրային քննարկումներից հետո այն կամփոփվի, և կներկայացվի նաև նախագծի վերջնական տեսքը: