Համապատասխան հայտի դեպքում Հայաստանը պատրաստ է աջակցել Հունաստանին

ԵՐԵՎԱն, 24 ՀՈՒԼԻՍԻ, ԱՄԵՆՊՐԵՍ: Համապատասխան հայտի դեպքում Հայաստանը պատրաստ է իր կարողությունների շրջանակում աջակցել Հունաստանին՝ բռնկված անտառային հրդեհները մարելու գործում:

«Արմենպրես»-ի մամուլի սրահում հրավիրված ասուլիսում ՀՀ ԱԻՆ Ճգնաժամային կառավարման ազգային կենտրոնի պետ, փրկարար ծառայության գնդապետ Հովհաննես Խանգելդյանը նշեց, որ առայժմ օգնության պաշտոնական հայտ չեն ստացել:

«Հայաստանի Հանրապետությունը դեռ պաշտոնապես չի ստացել օգնության հայտ: ԱԻՆ-ն իր լիազոր ստորաբաժանմամբ գրանցված է միջազգային «Ջիդաքս» համակարգում (Global Disaster Alerting and Coordination System), համագործակցության շրջանակում ստանում ենք այդ օգնության հայտը: Համապատասխան հայտի դեպքում Հայաստանն իր կարողությունների շրջանակում պատրաստ է աջակցել»,-ասաց Հովհաննես Խանգելդյանը:

Աթենքի արվարձաններում բնական հրդեհների հետեւանքով զոհվածների թիվը հասել է 50-ի: Տուժել է առնվազն 156 մարդ: Ավելի վաղ Հունաստանի նախարարների կաբինետի պաշտոնական ներկայացուցիչ Դիմիտրիս Ձանակոպուլոսը հայտնել էր տվյալներ 20 զոհվածների եւ 69 հոսպիտալացվածների մասին: ERT-ի տեղեկություններով՝ տուժածներից շատերը գտնվում են օրհասական վիճակում: Փրկարարական ծառայությունների եւ ձկնորսների կողմից ավելի քան 700 մարդ է փրկվել լողափերից, ուր մարդիկ փախել էին կրակից: Ինչպես հաղորդել է հեռուստաալիքը, հուլիսի 24-ի առավոտվա դեմ հրդեհների մեծ մասը հաջողվել է վերցնել հսկողության տակ: Սաստիկ քամին հանդարտվել է, որը վերջին օրերին նպաստում էր կրակի տարածմանը: Կրակի մարմանը գործի են դրված հրշեջ ինքնաթիռներ եւ ուղղաթիռներ: Հունաստանում հուլիսի սկզբից շոգ եղանակ է հաստատվել, վերջին օրերին օդի ջերմաստիճանը հասնում է 38 – 40 աստիճանի: Հուլիսի 23-ին Աթենքի շուրջը միանգամից հրդեհի մի քանի օջախ է բռնկել: Հունաստանի իշխանություններն արդեն օգնություն են խնդրել այլ երկրներից՝ տարերքի դեմն առնելու համար: