4 րոպեի ընթերցում
ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Բյուրականում տեղի ունեցավ ՀՄԸՄ-ի 100-ամյակի և 11-րդ համասկաուտական բանակումի բացման հանդիսավոր արարողությունը:
Ինչպես հաղորդում է «Արմենպրես»-ը՝բանակումը տևելու է հուլիսի 19-29-ը: Հայաստան են ժամանել շուրջ 1200 սկաուտներ ԱՄՆ-ից, Արգենտինայից, Ուրուգվայից, Բուլղարիայից, Եգիպտոսից, Լիբանանից, Ռուսաստանից, Ֆրանսիայից, Կանադայից և այլ երկրներից:
«ՀՄԸՄ-ն 100 տարեկան է, դա արդեն իսկ շատ կարևոր է: Այն մեծագույն վաստակ և դեր ունի հայապահպանության գործում: Մենք հաճախ խոսում ենք հային հայ պահելու մասին, բայց մոռանում ենք նշել մեկ այլ կարևորագույն գործոնի՝ երիտասարդ մարդուն հայ կերտելու մասին: Կարծում եմ, որ Հայաստանի Հանրապետությունը պետք է ջանք ու եռանդ չխնայի, որպեսզի լինի այսօրինակ կազմակերպությունների կողքին»,- ասաց ՀՀ սփյուռքի նախարար Մխիթար Հայրապետյանը: Նախարարը հավելեց նաև, որ համալրել է ՀՄԸՄ-ականների թիմը:
Բանակումի բացման արարողությունից առաջ կայացավ ՀՄԸՄ-ի 110 մասնաճյուղերի հուշաքանդակի բացումը, որին ներկա էին ՀՀ սփյուռքի նախարար Մխիթար Հայրապետյանը, փոխնախարար Բաբկեն Տեր-Գրիգորյանը, ՀՀ Արագածոտնի մարզպետ Աշոտ Սիմոնյանը, ՀՀ Կոտայքի մարզպետ Ռոմանոս Պետրոսյանը:
«Շատ ուրախ ենք և բարձր տրամադրություն ունենք: Ուրախ ենք, որ հանդիպեցինք արդեն ծանոթ մեր քույր-եղբայրներին, փափագում ենք հանդիպել նաև մեր նոր քույր-եղբայրների, նոր կապեր հաստատենք:1200 հոգու մի տեղ հավաքելը շատ մեծ և պատասխանատու գործ է: Մինչև գալս դժվարանում էի դա պատկերացնել: Բայց հիմա արդեն որ տեսնում եմ, շատ խոստումնալից է մեր գալիք սերունդների համար ևս»,- «Արմենպրես»-ի հետ զրույցում ասաց Երուսաղեմից հայրենիք ժամանած Սոսե Գրիգորյանը:
Ֆրանսիայից ժամանած սկաուտական պատգամավորության խմբապետ Արա Մատինյանը կարևորում է բանակումը նաև այն պատճաով, որ աշխարհի տարբեր ծայրերում ապրող սկաուտների հանդիպումը լավ հնարավորություն է՝ տեսնելու, թե ինչ աշխատանքներ են իրականացվում այլ երկրների ՀՄԸՄ-ական խմբերում. «Շատ խանդավառ աշխատանք ունենք իրականացնելու: Մեծ մտքով և կարևոր հավատքով ենք պատրաստվել 100-ամյակին մեր մասնակցությանը: Մեզ համար այսօր մեծ հպարտություն է ներկայացնել «Հոմենեթմեն Ֆրանսը», որն այս բոլոր տարիների ընթացքում հզոր կանգնած է ՀՄԸՄ-ական շարժման կողքին և տանում է հոմենեթմենական աշխատանքը Ֆրանսիայում՝ հավաքելով երիտասարդների և անգամ փոքրիկների: Ֆրանսիայում հայ հոմենեթմենականների ընդհանուր թիվը 110 է: Այսօր մեզ հետ Բյուրականի բանակավայր մենք բերել ենք մեծ հպարտություն, որ ցույց տանք մեր քույրերին և եղբայրներին, թե ինչ աշխատանք ենք տանում և տեսնենք նաև մյուսների աշխատանքը»:
ՀՄԸՄ-ի 100-ամյա հոբելյանը նշվում է ՀՀ նախագահ Արմեն Սարգսյանի, Նորին Սուրբ Օծություն Տեր Տեր Գարեգին Երկրորդի Ամենայն Հայոց Կաթողիկոսի, Նորին Սուրբ Օծություն Տեր Տեր Արամ Առաջին Մեծի Տանն Կիլիկիո Կաթողիկոսի բարձր հովանու ներքո և ՀՀ կառավարության աջակցությամբ: