ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: ԱՄՆ պետքարտուղարի Եվրոպայի և Եվրասիայի հարցերով օգնական ԲրիջեթԲրինկը, ով պաշտոնական այցով գտնվում է Ադրբեջանում, մայիսի 31-ին հանդիպել է Ադրբեջանի ընդդիմադիր «Ժողովրդական ճակատ» կուսակցության առաջնորդ Ալի Քերիմլիին:
Այս մասին, ինչպես հաղորդում է «Արմենպրես»-ը, հայտնում է ադրբեջանական «Թուրան» լրատվական գործակալությունը:
Հանդիպման ժամանակ կողմերը քննարկել են Ադրբեջանում տիրող հասարակական-քաղաքական իրավիճակի, այդ երկրի ժողովրդավարացման գործընթացի, քաղբանտարկյալների և «Ժողովրդական ճակատ» կուսակցության նկատմամբ իշխանությունների կողմից իրականացվող ճնշումների նոր ալիքի հետ կապված հարցեր:
Բրինկը մայիսի 31-ին պաշտոնական այցի շրջանակներում հանդիպել էր նաև Ադրբեջանի նախագահ Իլհամ Ալիևի, երկրի վարչապետի և արտաքին գործերի փոխնախարարի հետ:
Իլհամ Ալևի հետ հանդիպմանը Բրինկը քննարկել էր Ադրբեջանի հետ առևտրական կապերի, գազի արտահանման, անվտանգության ոլորտում համագործակցության վերաբերյալ մի շարք հարցեր:
Հանդիպման ժամանակ ԱՄՆ պետքարտուղարի օգնականը հատկապես ընդգծել էր, որ պետք է հարգվեն մարդու հիմնարար ազատությունները, և որ պետք է իշխի օրենքի գերակայությունը: