ԱՄՆ Պետդեպարտամենտն անդրադարձել է Ադրբեջանում կրոնական ազատությունների խնդրին

ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: ԱՄՆ Պետդեպարտամենտի Ժողովրդավարության և մարդու իրավունքների բյուրոն հրապարակել է «Աշխարհում կրոնի ազատությունը 2017թ. համար» զեկույցը:

Այս մասին, ինչպես հաղորդում է «Արմենպրես»-ը, հայտնում է ադրբեջանական «Թուրան» լրատվական գործակալությունը:

Զեկույցի Ադրբեջանին վերաբերող հատվածում ասվում է, որ այդ երկրի սահմանադրությունը սահմանում է պետության և կրոնի բաժանումը, բոլոր կրոնների ազատությունը:

Երկրի օրենքները նաև պաշտպանում են քաղաքացիների իրենց կրոնական համոզմունքները արտահայտելու և կրոնական ծեսերը անցկացնելու իրավունքը, եթե չկա հասարակական կարգի կամ հասարակական բարքերի խախտում:

Հակառակ Ադրբեջանի սահմանադրության հռչակած օրենքներին այդ երկրի տեղական իրավապաշտպան խմբերն ու անհատ իրավապաշտպանները նշում են, որ իշխանությունները շարունակել են կրոնական ակտիվիստների նկատմամբ ֆիզիկական հետապնդումները, ձերբակալություններն ու բանտարկությունները:

Նշվում է, որ 2017թ. վերջի դրությամբ ազատազրկման մեջ գտնվող հավատացյալների թիվը կազմել է 80, իսկ 2016թ. դրությամբ՝ 86:

«2017թ. հունվար-դեկտեմբեր ամիսներին երկար տարիների ազատազրկման են ենթարկվել 2015թ. «Նարդարանի գործով» ձերբակալված կրոնական ակտիվիստները: Շատ ակտիվիստների դեմ առաջադրված մեղադրանքները համարվում էին կեղծված, այդ թվում `կրոնական ատելություն և ահաբեկչություն հրահրելու մեղադրանքները»,-ասվում է զեկույցում:

Հուլիսին իշխանությունները կրոնական քարոզչին կրոնական արարողություն իրականացնելու համար ենթարկել են 3 տարվա ազատազրկման:

Ըստ զեկույցի՝ Ադրբեջանի կառավարությունը շարունակում է հրաժարվել «ոչ ավանդական» համարվող կրոնական կազմակերպությունները գրանցելուց, ինչը խախտում է կրոնական իրավունքները:

Զեկույցում նշվում է, որ 2017թ. կառավարությունը շարունակել է վերահսկել կրոնական նյութերի ներմուծման, տարածման և վաճառքի գործընթացները:

«Դատավորները տուգանել են բազմաթիվ անձանց կրոնական բովանդակություն պարունակող նյութերի վաճառքի և տարածման համար»,-նշված է զեկույցում:

2015 թվականի նոյեմբերի 26-ին նամազի ժամանակ իրավապահները ներխուժել են Նարդարանի շիական «Իմամ Հուսեին» մզկիթ, հայհոյանքներ տեղացել այնտեղ գտնվողների հասցեին, բռնություններ գործադրելով ձերբակալել Ադրբեջանի շիաների առաջնորդ Թալե Բաղըրզդեին և այլ հավատացյալների: Ոստիկանների գործողությունները զայրացրել են Նարդարանի բնակիչներին: Նրանց և ոստիկանության միջև բախումներ են սկսվել: Հաջորդ օրերին իսլամիստների և ոստիկանության միջև բախումներ են սկսվել նաև Գյանջայում, Լենքորանում և այլ քաղաքներում:

Ադրբեջանի ՆԳՆ-ն և գլխավոր դատախազությունը միջադեպի առնչությամբ հայտարարություն էին տարածել, որում ասվում էր, որ ավանի շիա առաջնորդները ծրագրում են բռնությամբ փոխել սահմանադրական կարգը և երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում ու երկրի շրջաններում և մատակարարել նրանց զենքով և պայթուցիկ նյութերով: «Բացի այդ խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում և թռուցիկներ բաժանել բնակչությանը և որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում», -նշվել էր հայտարարության մեջ: