«Վիրահայերի միասնություն»-ը միանում է անհապաղ բանակցություններ սկսելու Սերժ Սարգսյանի կոչին
2 րոպեի ընթերցում
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: «Վիրահայերի միասնություն» հայրենակցական միությունը միանում է Հայաստանի վարչապետ Սերժ Սարգսյանի կոչին, որպեսզի Ազգային ժողովի «Ելք» խմբակցության ղեկավար Նիկոլ Փաշինյանն անհապաղ բանակցությունների սեղանի շուրջ նստի: «Արմենպրես»-ի հետ զրույցում այս մասին ասաց «Վիրահայերի միասնություն» հայրենակցական միության նախագահ, Ազգային ժողովի ՀՀԿ խմբակցության պատգամավոր Տաճատ Վարդապետյանը:
«Ես պաշտոնապես հայտարարում եմ, «Վիրահայերի միասնություն» հայրենակցական միությունը միանում է վարչապետ Սերժ Սարգսյանի կոչին, որ անհապաղ Նիկոլ Փաշինյանը և իր համակիրները բանակցությունների սեղանի շուրջ նստեն: Վիրահայերին միավորող մեր բազմահազարանոց միությունը համաձայն է Հայաստանի վարչապետ Սերժ Սարգսյանի հայտարարության բովանդակությանն ամբողջությամբ»,- ասաց Վարդապետյանը:
Նա հավելեց, որ իրենք սատարում են վարչապետին և պաշտպանում նրա տեսակետը, քանի որ այդպես հնարավոր կլինի խուսափել անդառնալի հետևանքներից:
ՀՀ վարչապետ Սերժ Սարգսյանն ապրիլի 21-ին հայտարարություն է արել ներքաղաքական իրավիճակի վերաբերյալ: «Խորապես մտահոգված եմ ծավալվող ներքաղաքական զարգացումներով: Անդառնալի կորուստներից խուսափելու նպատակով՝ կոչ եմ անում Ազգային ժողովի պատգամավոր Նիկոլ Փաշինյանին նստել քաղաքական երկխոսության և բանակցությունների սեղանի շուրջ: Դա պետք է անել անհապաղ»,- ասված է հայտարարությունում: