Միջազգային հանրության կողմից Ադրբեջանի գործողություններին ոչ համարժեք պատասխանը ստեղծում է անպատժելիության մթնոլորտ. փորձագետ

ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: Միջազգային հանրության կողմից Ադրբեջանի գործողություններին ոչ համարժեք պատասխանը ստեղծում է անպատժելիության մթնոլորտ: Այս մասին «Արմենպրես»-ի մամուլի սրահում հրավիրված ասուլիսում նշեց «Հայացք» վերլուծական կենտրոնի փորձագետ Նարեկ Մինասյանը:

«Ժնևյան հանդիպումից հետո ձևավորվել էր դրական ակնկալիքների ֆոն: Մասնավորապես խոսվում էր այն մասին, որ սահմանագծում լարվածության ձեռքբերման հետ կապված պայմանավորվածությունները կպահպանվեն: Ակտիվ աշխատանքի անցան արտգործանախարարները, բայց հարաբերական անդորրից հետո, մենք կրկին տեսնում ենք, որ ընտրական գործընթացները Ադրբեջանում հանգեցրեցին, թե ռազմական հռետորաբանության, թե սահմանային իրավիճակի ակտիվացման: Մի կողմից կազմակերպվում էին տարբեր զորավարժություններ, մյուս կողմից Ալիևը սպառնալիքի լեզվով էր խոսում Հայաստանի հետ` անելով անհեթեթության հասնող հայտարարություններ»,-ասաց Նարեկ Մինասյանը:

Նրա խոսքով, ներկայում ղարաբաղյան հարցի շուրջ բանակցային գործընթացում դրական ակնկալիքներ պետք չէ ակնկալել, քանի որ Ադրբեջանը շարունակում է առավելապաշտական դիրքորոշումն ամրապնդել: Ըստ փորձագետ` ընտրություններից հետո Ալիևը կփորձի կոշտացնել իր դիրքորոշումը բանակցային տարբեր տարրերի հետ կապված:

«Միջազգային հանրության կողմից ոչ բավարար և ոչ այդքան համարժեք արձագանքը, երբեմն դրա բացակայությունը, Ալիևի իշխանության համար ստեղծվում է անպատժելիության մթնոլորտ: Սահմանային լարվածություն միշտ եղել է այլ, հարց է, որ տարբեր իրադրություններով պայմանավորված այն ավելացվում է հասարակության ուշադրությունը շեղելու համար»,-հավելեց Նարեկ Մինասյանը: