ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Ադրբեջանում գործող ընդդիմադիր Ժողովրդական ճակատ կուսակցության փոխանցմամբ` մարտի 31-ին տեղի ունեցած բողոքի ակցիայից հետո անհետացել է իրենց երիտասարդ ակտիվիստներից մեկը` Ֆաթիմա Մովլանլըն:
Այս մասին, ինչպես հաղորդում է «Արմենպրես»-ը, հայտնում է ադրբեջանական meydan.tv-ն:
Կուսակցության հաղորդմամբ` կասկածներ կան, որ աղջիկը քաղաքական հայացքների պատճառով ձերբակալվել է, և ներկայումս իշխանությունները նրան պահում են մեկուսացված վիճակում:
Ակտիվիստի հարազատները դիմել են ոստիկանություն, սակայն նրա գտնվելու վայրի մասին դեռևս տեղեկություններ չկան:
Ֆաթիմա Մովլանլըն մարտի 26-ին կանչվել էր ոստիկանություն և հարցաքննվել:
Մարտի 31-ին Բաքվում տեղի է ունեցել Ադրբեջանի Ժողովրդավարական ուժերի ազգային խորհրդի կողմից կազմակերպված բողոքի ակցիան, որն ուղղված է եղել ապրիլի 11-ին կայանալիք նախագահական ընտրությունների դեմ:
Հանրահավաքը ուղեկցվել է իշխանությունների դեմ ուղղված կոռուպցիայի, մարդու իրավունքների խախտման, Ղարաբաղյան հակամարտության լուծված չլինելու, տնտեսական խնդիրների մեղադրանքներով:
Ակցիայի մասնակից ուժերը Ադրբեջանի քաղաքացիներին կոչ են արել բոյկոտել նախագահական ընտրությունները: