Երեւանի զարգացման ծրագրով կվերանորոգվեն բոլոր մանկապարտեզները

ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Երեւանի զարգացման ծրագրով կվերանորոգվեն մայրաքաղաքի բոլոր մանկապարտեզները:

«Արմենպրես»-ի հաղորդմամբ, լրագրողների հետ զրույցում այս մասին ասաց Երեւանի քաղաքապետարանի աշխատակազմի հանրակրթության վարչության պետԱննաՍտեփանյանը:

Նրա խոսքով`այսօր Երեւանի քաղաքապետ Տարոն Մարգարյանի ուշադրության կենտրոնում են գտնվում բոլոր կրթական հաստատությունները: «Պետք է նշեմ, որ քաղաքապետարանի զարգացման ծրագրով այս տարի եւս մի շարք մանկապարտեզներ կվերանորոգվեն, այնուհետեւ, տարիների ընթացքում, այս հնգամյա զարգացման ծրագրի շրջանակում կվերանորոգվեն երեւանյան բոլոր մանկապարտեզները»,-հավելեց նա:

Երեւանի քաղաքապետարանի՝ կրթական ոլորտում իրականացվող ծրագրերի հիմնական նպատակը յուրաքանչյուր երեխայի կրթության համար բարենպաստ պայմանների ապահովումն է։ 2017 թվականին ապահովվել է նախադպրոցական տարիքի երեխաների ներդաշնակ զարգացումը մանկապարտեզներում։ Ապահովվել է 30 հազար 300 երեխայի անվճար կրթությունը, այդ թվում՝ 189 երեխայի ներառական կրթությունը:

2017 թվականի ընթացքում մայրաքաղաքում հիմնանորոգվել է 8 մանկապարտեզ: