Թուրքիայի ԱԳՆ-ն մտահոգված է Սիրիայի սահմանների անվտանգության ուժեր ստեղծելու ԱՄՆ մտադրությամբ
2 րոպեի ընթերցում
ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: Թուրքիայի արտաքին գործերի նախարարությունը պաշտոնապես իր դժգոհությունն է հայտնել այն փաստի առնչությամբ, որ Միացյալ Նահանգները պատրաստվում են Սիրիայի հյուսիսում քրդական «Սիրիական դեկոմրատական ուժեր»-ի (SDF) հետ ստեղծել «սահմանների անվտանգության ուժեր»: Ինչպես հաղորդում է «Արմենպրես»-ը, այս մասին Թուրքիայի ԱԳՆ-ն հայտարարություն է տարածել:
Հայտարարության մեջ պաշտոնական Անկարան Սիրիայի քրդական ուժերի հետ համագործակցությունն անվանել է «սխալ և մտահոգիչ»: Թուրքական կողմի համոզմամբ՝ նման քայլը մեծապես վնասելու է նաև «Իսլամական պետություն» ահաբեկչական կազմակերպության դեմ պայքարին: Թուրքիայի ԱԳՆ-ն Միացյալ Նահանգների կողմից նման որոշումն անվանել է «ծայրաստիճան սխալ»:
«Իսլամական պետություն» խմբավորման դեմ պայքարող ԱՄՆ գլխավորած միջազգային կոալիցիան մտադիր է Սիրիայում ստեղծել սահմանների անվտանգության ուժեր՝ համագործակցելով «Սիրիական դեմոկրատական ուժերի» հետ: Կոլաիցիայի մամուլի խոսնակ Թոմաս Վիլը հայտնել է, որ ակնկալվում է, որ ուժերի կազմում ներգրավված է լինելու շուրջ 30 հազար մարդ: Նրանք տեղակայվելու են Թուրքիայի և Իրանի սահմանի երկայնքով:
«Սիրիական դեմոկրատական ուժեր»-ն ընդդիմադիր դաշինք է, որի կազմում ներառված են մեծապես քրդեր, ինչպես նաև արաբներ և այլ էթնիկ ներկայացուցիչներ: Այն կազմավորվել է 2015 թվականի հոկտեմբերին՝ ԻՊ դեմ պայքարելու նպատակով: