Թուրքիայի կողմից ԵԱՀԿ Մինսկի խմբի համանախագահների կազմ խցկվելու փորձերը մշտապես տապալվել են. Ռուբեն Սաֆրաստյան  

ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Այս տարիների ընթացքում Թուրքիան բազմիցս փորձել է արցախյան հարցի խաղաղ կարգավորման գործընթացում հանդես գալ որոշակի նախաձեռնություններով՝ հօգուտ Ադրբեջանի, խցկվել ԵԱՀԿ Մինսկի խմբի համանախագահների կազմ, սակայն տապալվել է: «Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը: Նրա խոսքով՝ այս հարցի առնչությամբ Թուրքիայի կողմից հնչող հայտարարությունները առաջինը չեն, սակայն դրանք բոլորն էլ անհաջողության են մատնվել ոչ միայն այն պատճառով, որ Թուրքիան ակնհայտորեն պաշտպանում է Ադրբեջանին, այլեւ այն, որ համանախագահները, իրենց վրա վերցնելով բանակցային գործընթացի միջնորդի կարգավիճակը, ոչ մի մտադրություն չունեն ընդլայնելու իրենց շրջանակը:

«Այստեղ պետք է ընդգծել սակայն, որ բանակցային գործընթացը չի գնում առաջ հենց Ադրբեջանի պատճառով, քանի որ այն ցուցաբերում է իմիտացիոն մոտեցում, դա ճշմարտության միայն մեկ մասն է: Իսկ հիմնական մասն այն է, որ, բացի իմիտացիոն մոտեցում ցուցաբերելուց, Ադրբեջանը նաեւ ուղղակիորեն կիրառում է ուժ՝ ժամանակ առ ժամանակ լայնածավալ, անընդմեջ դիմում է սադրանքների սահմանամերձ շրջաններում. ըստ էության, դա ցույց է տալիս, որ Ադրբեջանն ընդհանրապես շահագրգռված էլ չէ բանակցային գործընթացում»,-նշեց նա:

Հարցին, թե արդյոք վերջերս Նախիջեւանում անցկացված ադրբեջանական բանակի զորավարժությունները ինչ-որ վտանգ ներկայացնու՞մ են, Ռուբեն Սաֆրաստյանը նշեց, որ տեսնում է Հայաստանին, Երեւանին ուղղված վտանգ:

«Ցավոք, ե՛ւ Ադրբեջանը, ե՛ւ Թուրքիան հնարավորություն են փնտրում այնտեղ ուժեղացնելու իրենց ռազմական ներկայությունը, ինչը մտահոգիչ է»,-նշեց թուրքագետը՝ ընդգծելով, որ ներկայումս հայկական կողմի կարեւոր քայլը պետք է լինի պաշտպանողականության ուժեղացումը:

«Ես կարծում եմ, որ այս ուղղությամբ մեր հանրապետության ղեկավարության կողմից գործադրվող ջանքերը միանգամայն ադեկվատ են: Բացի դրանից, պետք է դիվանագիտական քայլեր եւս ձեռնարկվեն, համաշխարհային հանրությանը, դաշնակիցներին պետք է ամեն կերպ ներկայացնել, տեղյակ պահել Նախիջեւանում տեղի ունեցող զարգացումներից»,-եզրափակեց Ռուբեն Սաֆրաստյանը:

Թուրքիայի արտաքին գործերի նախարար Մևլութ Չավուշօղլուն նոյեմբերի 29-ին Անկարայում հանդիպում է ունեցել ԵԱՀԿ Մինսկի խմբի համանախագահներ Իգոր Պոպովի (Ռուսաստան),Ստեֆան Վիսկոնտիի(Ֆրանսիա) և Էնդրյու Շեֆերի (ԱՄՆ) հետ: Այս մասին Թուրքիայի արտաքին քաղաքական գերատեսչության ղեկավարը գրառում էր կատարել Թվիթերի իր միկրոբլոգում: Հանդիպմանը մասնակցել էր նաև ԵԱՀԿ գործող նախագահի անձնական ներկայացուցիչ Անջեյ Կասպշիկը: