Նախագահ Սարգսյանը անհրաժեշտ է համարում, որ «Լույս» հիմնադրամի կրթաթոշակառուները ծառայեն Հայոց բանակում
2 րոպեի ընթերցում
ԵՐԵՎԱՆ, 21 ՀՈՒԼԻՍԻ ԱՐՄԵՆՊՐԵՍ: ՀՀ Նախագահ Սերժ Սարգսյանը ցանկանում է, որ «Լույս» հիմնադրամի՝ մագիստրատուրա ընդունվող տղա կրթաթոշակառուները ծառայած լինեն հայկական բանակում։ «Արմենպրես»-ի հաղորդմամբ՝ այս մասին ՀՀ Նախագահն ասաց «Լույս» հիմնադրամի կրթաթոշակառուների հետ հանդիպմանը՝ հիմնադրամի ռազմավարության մեջ փոփոխությունների վերաբերյալ երիտասարդներից մեկի հարցին ի պատասխան:
«Մենք ցանկանում ենք, որ հիմնադրամի շահառուներն իրենց ավանդը ներդնեն Հայաստանի զարգացման գործում, այսինքն՝ օտարերկրյա բուհերն ավարտելուց հետո նրանք որոշակի ժամկետով մնան և աշխատեն Հայաստանում։ Ես համարում եմ, որ հիմնադրամը պետք է համահունչ աշխատի Հայաստանում տեղի ունեցող փոփոխություններին։ Իրականացնում ենք ծրագիր, համաձայն որի՝ բուհերում սովորող բոլոր երիտասարդները կամ ընթացքում պետք է ծառայեն հայկական բանակում, կամ ավարտելուց հետո որոշակի ժամկետով պետք է ծառայեն որպես սպաներ։ Մենք ուզում ենք, որ հիմնադրամի շրջանավարտներն ավելի արդյունավետ մասնակցեն Հայաստանի զարգացման գործին»,- ասաց Սերժ Սարգսյանը։
2009 թվականից ի վեր ՝ «Լույս» հիմնադրամն աջակցել է ավելի քան 500 ուսանողների՝ կրթություն ստանալու աշխարհի ամենահեղինակավոր բուհերում: