Արցախի նախագահը մասնակցել է բարձրագույն կրթության հիմնախնդիրներին նվիրված աշխատաժողովի բացմանը
1 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Արցախի Հանրապետության Նախագահ Բակո Սահակյանը հունիսի 28-ին ներկա է գտնվել Ստեփանակերտում մեկնարկած «Բարձրագույն կրթության հիմնախնդիրներ եւ հեռանկարներ» աշխատաժողովի բացմանը:Այս մասին «Արմենպրես»-ին տեղեկացրին Արցախի Հանրապետության նախագահի աշխատակազմի տեղեկատվության գլխավոր վարչությունից:
Երկրի ղեկավարը կարեւոր ու պահանջված է համարել կրթության հիմնախնդիրների շուրջ նման ներկայացուցչական միջոցառման կազմակերպումն Արցախում՝ նշելով, որ երկրի ամենամեծ հարստությունը ժողովուրդն է, նրա անսպառ մտավոր ներուժը:
Նախագահ Սահակյանն ընդգծել է, որ գիտության եւ կրթության ոլորտը հանդիսանում է Հայաստան-Արցախ-Սփյուռք եռամիասնության ամրապնդման գործուն ուղիներից, հատկապես՝ գլոբալիզացիայի ներկա ժամանակահատվածում, հավելելով, որ ինչպես ռազմավարական կարեւորագույն այլ ծրագրերի իրականացման գործում, կրթության ոլորտում եւս Արցախը զգում է Մայր Հայաստանի եւ Սփյուռքի աջակցության անհրաժեշտությունը: