1 րոպեի ընթերցում
ՍՏԵՓԱՆԱԿԵՐՏ, 5 ՀՈՒՆԻՍԻ, ԱՐՄԵՆՊՐԵՍ: Արցախի պաշտպանության բանակն ապրիլյան պատերազմի ժամանակ ոչ մի զինամթերքի պակաս չի ունեցել: «Արմենպրես»-ի հաղորդմամբ՝ այս մասին լրագրողների հետ հանդիպման ժամանակ վստահեցրեց Արցախի Հանրապետության պաշտպանության բանակի հրամանատար գեներալ-լեյտենանտ Լևոն Մնացականյանը: «Մարտալրակազմը դիրքերում մի քանի անգամ ավելի է եղել, քան սահմանված է: Ապրիլյան դեպքերի ժամանակ մենք զինամթերքի պակաս չենք ունեցել: Ներկայումս սպառազինության տեսականու առումով ունենք աճ առաջնագծում: Այն համալրվել է տեխնիկապես ավելի արդիական և նոր միջոցներով»,- ասաց Մնացականյանը:
Արցախի ՊԲ-ն աշխատանք է կատարում դիրքերում ինքնահոս ջուր հասցնելու ուղղությամբ: Լևոն Մնացականյանի վստահեցմամբ՝ այժմ դիրքերում զինվորների լողանալու համար շաբաթը մեկ անգամ բարձրանում են մեքենաներ: «Ջուրն ինքնահոս հասցնելու համար խողովակները հասցրել ենք դիրքեր»,-ասաց Մնացականյանը:
ՊԲ հրամանատարը նաև նշեց, որ ներկայումս զորամասերում հնարավորություն են ստեղծում, որպեսզի սպաներն ինտերնետային կապի միջոցով, առանց գումար ծախելու շփվեն իրենց հարազատների և ծնողների հետ: «Դրանից բացի, տեսակապ ենք նաև ապահովելու, որն ավարտական փուլում է»,-հավելեց նա: