2 րոպեի ընթերցում
ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը վստահ է, որ խորհրդարանական համակարգն առավել արդյունավետ է և ավելի լավ հնարավորություններ է ստեղծում պետական կառավարման համար: Ինչպես հաղորդում է «Արմենպրես»-ը, այս մասին ՀՀ Նախագահը նշել է Euronews-ի հետ զրույցում:
«Իմ խորին համոզմամբ խորհրդարանական համակարգը հնարավորություն է տալիս ավելի արդյունավետ կառավարման: Եվ սա հնարավորություն է տալիս քաղաքացիներին, և ընդհանրապես քաղաքացիական հասարակությանն ավելի ակտիվ մասնակցել երկրի առջև տարածացած խնդիրների լուծմանը: Դա ենք ցանկանում, որպեսզի մեր քաղաքացիներն ավելի քիչ դժգոհեն, քան ուրիշները»,- շեշտել է երկրի ղեկավարը:
Անդրադառնալով այն հարցին, թե արդյոք ՀՀԿ նախընտրական ցուցակում Սերժ Սարգսյանի չընդգրկվելը նշանակում է, որ նա հեռանում է քաղաքականությունւից՝ ՀՀ Նախագահը պարզաբանել է.«Դա նշանակում է, որ մենք հաշվի ենք առնում մեր ընդդիմության անհանգստությունը, որ խորհրդարանական ընտրություններում մենք կօգտագործենք իշխանական ռեսուրսներ: Դա նշանակում է, որ մենք հնարավորություն ենք տալիս երիտասարդներին դրսևորվելու: Արդեն 10 տարի է ես Հանրապետական կուսակցության ղեկավարն է և ես մնում եմ կուսակցության ղեկավար»:
Իսկ այն հարցին, թե խորհրդարանական համակարգին անցնելով ինչ երկիր է դառնալու Հայաստանը, Սերժ Սարգսյանը պատասխանել է.«Բոլոր հայերի համար ցանկալի երկիր»: