Բուխարեստում տեղի է ունեցել Հրանտ Դինքի հիշատակին նվիրված միջոցառում

ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: Ռումինիայի մայրաքաղաք Բուխարեստում տեղի է ունեցել Հրանտ Դինքի հիշատակին նվիրված միջոցառում, որին ներկա է գտնվել նաև Ռումինիայում ՀՀ արտակարգ և լիազոր դեսպան Համլետ Գասպարյանը: Այս մասին «Արմենպրես»-ին տեղեկացրին Ռումինիայի Հայոց թեմի մամլո դիվանից: Հաղորդագրությունը ներկայացնում ենք ամբողջությամբ.

«Այս տարի լրացավ հայկական Ակոս թերթի խմբագիր, Թուրքիայի երևելի մտավորականերից մեկի՝ Հրանտ Դինքի հրեշավոր սպանության 10-րդ տարելիցը: Նա հայտնի էր իր անվախ ելույթներով, քաղաքական ամենախճճված խնդիրները մեկնաբանող համարձակ հոդվածներով ու հայրենասիրությամբ։ Այս օրերին ու շաբաթներին աշխարհի մի շարք երկրներում ու հայաշատ քաղաքներում տեղի ունեցան և դեռ շարունակվում են տեղի ունենալ հիշատակի միջոցառումներ ու բողոքի ակցիաներ, քանզի անցոնղ տասը տարիների ընթացքում Հրանտ Դինքի սպանությունը այդպես էլ չի բացահայտվել:

Այս իրադարձություններին անմասն չէր նաև ռումինահայ համայնքը: Ռումինիայի Հայոց Թեմի առաջնորդ գերշ. Տ. Տաթև եպս. Հակոբյանի և Ռումինահայոց միության նախագահ Վարուժան Ոսկանյանի նախաձեռնությամբ փետրվարի 5-ին Բուխարեստում տեղի ունեցավ հիշատակի միջոցառում: Օրը սկսվեց Ս. Պատարագի մատուցմամբ: Առաջնորդանիստ Ս. Հրեշտակապետաց Մայր Եկեղեցում, հանդիսապետությամբ Թեմակալ առաջնորդի, Ս. Պատարագ մատուցեց Կոնստանցայի և տարածաշրջանի հոգևոր հովիվ արժ. Տ. Օշական քհն. Խաչատրյանը: Ներկա էին նաև Ռումինիայում ՀՀ արտակարգ և լիազոր դեսպան Համլետ Գասպարյանը, հյուպատոս Աշոտ Գրիգորյանը, Ռումինիայի Հայոց Միության նախագահ Վարուժան Ոսկանյանը, Ազգային փոքրամասնությունների ղեկավար Վարուժան Փամբուկչյանը, թեմական ու ծխական խորհուրդների անդամներ և ուրիշներ: Սրբազան Հայրն իր քարոզում մեկ անգամ ևս ընդգծեց Հրանտ Դինք մտավորականի, լրագրողի և մարդու մեծությունն ու կատարած հսկայածավալ աշխատանքի կարևորությունը: Սրբազանը մասնավորապես նշեց. ,, ժամանակը ի զորու չէր ամոքելու կամ մոռացության մատնելու այն խորը վերքը, որը պատճառվել էր Հրանտ Դինքի ընտանիքի անդամներին, ընկերներին ու ամբողջ աշխարհասփյուռ հայությանը: Այս օրերին ու անցնող շաբաթների ընթացքում աշխարհի մի շարք երկրներում ու հայաշատ քաղաքներում տեղի ունեցան և դեռ շարունակվում են տեղի ունենալ հիշատակի միջոցառումներ ու բողոքի ակցիաներ, քանզի անցնող տասը տարիների ընթացքում Հրանտ Դինքի սպանությունը այդպես էլ չի բացահայտվել: Ցավալի է, բայց միևնույն ժամանակ իրողություն է, որ մեկ տասնամյակ անց դատավարությունն այդպես էլ ի հայտ չի բերել սպանության իրական կազմակերպիչներին՝ անպատժելիության մթնոլորտ ստեղծելով Թուրքիայում լրագրողների և առհասարակ մտավորականների նկատմամբ այլ բռնությունների և սպանությունների, ինչպես նաև խոչընդոտ հանդիսանալով դրանց բացահայտման համար: Այսօր Հրանտ Դինք անունը ոչ միայն չի մոռացվել, այլ շարունակում է ուժ տալ իր գաղափարակիցներին ու հետևորդներին,,:

Հավարտ Ս. Պատարագի կատարվեց Հոգեհանգստյան պաշտոն Հրանտ Դինքի հոգու հանգստության համար, որից հետո ծաղկեպսակներ զետեղվեցին եկեղեցու պարտեզում կանգնեցված Հայոց Ցեղասպանության նահատակներին նվիրված խաչքարի առջև:

Հոգեհանգստյան արարողությունից հետո ներկաները հավաքվեցին Դուդյան մշակութային տանը, ուր տեղի ունեցավ միջոցառում՝ նվիրված Հրանտ Դինքի հիշատակին: Ներկա էին Ռումինիայի Հայոց Թեմի առաջնորդ գերշ. Տ. Տաթև եպս. Հակոբյանը, Ռումինիայում ՀՀ արտակարգ և լիազոր դեսպան Համլետ Գասպարյանը, հյուպատոս Աշոտ Գրիգորյանը, Ռումինիայի Հայոց Միության նախագահ Վարուժան Ոսկանյանը, Ազգային փոքրամասնությունների ղեկավար Վարուժան Փամբուկչյանը, գրող, քաղաքական մեկնաբան Պետրոս Հորասանջյանը, պատմաբան Սորին Անտոքին, Գաբրիել Արդրեեսկուն, հայ համայնքի ներկայացուցիչներ: Միջոցառումը սկսվեց Սրբազան Հոր օրհնությամբ ու բացման խոսքով: Սրբազանը մասնավորապես նշեց. ,,Հրանտ Դինքի սպանությունը բացահայտ ոտնձգություն էր ընդդեմ ազատ խոսքի, ժողովրդավարության ու այն գաղափարների, որի կրողն էր մեծ մտավորականը: Իբրև ճշմարտության առաջամարտիկ, անտեսելով բոլոր տեսակի սպառնալիքներն ու ոտնձգությունները, Հրանտ Դինքը բոլոր ամբիոններից պահանջում էր ճանաչել Հայոց Ցեղասպանությունը, չհերքել պատմական իրողությունը և մերժողական դիրքորոշմամբ հանցակից չդառնալ երիտթուրքական ու օսմանյան իշանություններին: Լինելով հայ, Հրանտ Դինքը չէր պայքարում միայն հայ ժողովրդի պահանջատիրության համար, այլ ընդհանրապես պայքարում էր ամեն տեսակ անարդարության ու ապօրինությունների դեմ, մարդու իրավունքների ոտնահարման ու զանազան բռնությունների դեմ:

Սակայն, ինչպես շուրջ 100 տարիներ առաջ, այնպես էլ այսօր, ժամանակակից Թուրքիայի իշխանություններն ընտրեցին խնդրի լուծման այլ ճանապարհ՝ սպանության, ոճրագործության և առաջավոր գաղափարներ կրող վառ անհատականությանը լռեցնելու հանցավոր ու անմարդկային ճանապարհը: Սակայն այս քաղաքական ու գաղափարական սպանությունը, ի հեճուկս Թուրքիո իշխանությունների, լիովին հակառակ ազդեցություն ու էֆեկտ ունեցավ: Հրանտ Դինքը հարյուր հազարավոր գաղափարակիցներ ունեցավ ինչպես Թուրքիայում, այնպես էլ աշխարհի զանազան անկյուններում, այդ թվում նաև բազում թուրք գաղափարակիցներ, որոնք պայքարում են ավելի դեմոկրատ ու քաղաքակիրթ երկիր ունենալու երազի համար,,:

Այնուհետև ելույթներ ունեցան դեսպան Համլետ Գասպարյանը, Սորին Անտոքին, Վարուժան Ոսկանյանը և Պետրոս Հորասանջյանը: Վարուժան Ոսկանյանը մասնավորապես շեշտեց այն հանգամանքը, որ Թուրքիան երբևէ չի կարող դառնալ դեմոկրատ երկիր, քանի դեռ չի ճանաչել Հայոց Ցեղասպանությունը, երբևէ չի կարող դառնալ Եվրոմիության անդամ, քանի դեռ չի ճանաչել Հայոց Ցեղասպանությունը:

Մեկ անգամ ևս փաստվեց այն հանգամանքը, որ քանի դեռ ոճրագործները չեն պատժվել, բռնություններն ու ապօրինություները շարունակելու են խաթարել մարդկության խաղաղ ընթացքը: Միևնույն ժամանակ հույս և վստահություն հայտնվեց, որ ի վերջո արդարությունը հաղթանակելու է, ինչպես վաղուց արդեն հաղթանակել է մեծ լրագրողի ու մտավորականի գաղափարախոսությունը:

Միջոցառումն ավարտվեց Առաջնորդի աղոթքով՝ հայցելով հանգստություն ու խաղաղություն Հրանտ Դինքի անմահ հոգու համար, հայցելով նաև Բարձրյալի օգնականությունն ու պահպանությունը Հրանտ Դինքի ընտանիքի, հարազատների ու գաղափարակիցների անվտանգության ու խաղաղ ընթացքի համար»: