1 րոպեի ընթերցում
ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Ավստրիայի խորհրդարանն ընդունել է բանաձև Թուրքիայի նկատմամբ զենքի վաճառքի էմբարգո կիրառելու վերաբերյալ: Ինչպես հաղորդում է «Արմենպրես»-ը, այս մասին տեղեկացնում է «Ակոս» պարբերականը:
Կանաչների կուսակցության կողմից ներկայացված և 6 կուսակցությունների կողմից ընդունված նախագծում որպես էմբարգոյի հիմնավորումներ են ներկայացված զինված հեղաշրջման փորձից հետո ահաբեկչության դեմ պայքարի շրջանակում ընդդիմադիրների դեմ ուղղված գործողությունները, լրագրողների, գրողների և ակադեմիկոսների ձերբակալությունները և կալանավորումները, աշխատանքից զանգվածային հեռացումները և ռազմական գործողություններում քաղաքացիական անձանց կորուստները:
«Ավստրիան այսօրվանից սկսած Թուրքիայում Էրդողանի ռեժիմի դեմ պատժամիջոց կիրառած առաջին երկիրն է դարձել: Հրավիրում ենք Եվրամիությանը հետևել մեր օրինակին»,- ասել է Կանաչների կուսակցության անվտանգության քաղաքականության հարցերով խոսնակ Պետեր Պիլզը:
Թեպետ խորհրդարանի որոշումը օրինական տեսանկյունից պարտադրող ուժ չունի, այդուհանդերձ այն լինելու է երկրի կառավարության ուշադրության կենտրոնում: